熱刺喺周三英聯盃八強作客英冠史篤城，憑住加里夫巴利上半場先拔頭籌，同埋賓戴維斯同哈利卡尼末段各省一粒，以3:1淘汰對手，四強會喺主場鬥賓福特，但今場難得正選嘅迪利阿里，俾領隊摩連奴換走時竟當眾發老脾踢場邊水樽箱，賽後俾呢位牙擦主帥訓斥，直接話佢就係成隊入面嘅麻煩友。「大聖爺」巴利今場先用頭槌開紀錄，之後就小腿拉傷要由孫興民入替，而且踢到53分鐘被史篤城追成平手。好彩熱刺後尾靠賓戴維斯遠射同卡尼埋齋，有驚無險咁贏3:1過關，但摩佬賽後就唔太開心，事關隊內有人激親佢，就係同佢關係越嚟越差嘅迪利阿里。喺聯賽好少機會出場嘅阿里呢場難得正選，但踢到66分鐘就被換走，點知佢一出場就喺摩佬面前踢場邊嘅水樽箱，黑口黑面返到後備席，搞到摩佬賽後喺記者會力數佢今場犯咩錯：「踢中場呢個位係要幫球隊創造機會同做聯繫，唔係為球隊製造問題。今場個失波，我哋防守上失咗平衡，中場球員失晒位，對手就把握機會追平。」睇嚟迪利阿里喺1月被借走機會又大增。