有線四人幫喺2020年最大功勳，當然係鏟起咗《新聞刺針》同搞到中國組總辭啦。八方收到風，話人「爛仔」嘅總監陳興昌拿拿臨亡羊補牢，免得冇咗中國組，冇得報道國家有幾偉大！至於係邊隻「羊」呢？就係現任鳳凰衞視財經編輯陳國揚同前央視駐港記者史可為，聽聞陳國揚近日已向鳳凰辭職。
原來佢哋喺亞視年代已經跟陳興昌搵食，亞視收檔後，陳國揚轉咗去鳳凰衞視，繼續為國家效力。史可為仲巴閉，去咗央視做駐港記者，之後轉行搞生意，賣咗幾年日本物業。
兩位喺行內有乜威水史？八方問過好多跑慣兩岸新聞嘅行家，答案係「冇」，陳國揚連每年重頭戲北京兩會都未做過，如果做中國組阿頭，證明陳興昌用人眼光「獨到」；史可為曾經為央視賣過命，跑遍烽火大地，堪稱深慶得人，不過當時嘅普通話就幾普通。
重組中國組嘅兩位核心人物嚟自親共傳媒同黨媒，他日中國組報啲乜？大家可以想像到。有行家就剝花生話，𠵱家好似成間亞視搬去有線，唔知會唔會有亞視嘅收場？八方向兩位當事人求證，陳國揚話「冇評論、唔方便」；史可為就未回覆。
李八方
