近日刨通告時看到，富智康（2038）在上周一開始回購，日日買三幾百萬股，多年沒仔細睇過佢條數，發現了一些有趣之處。
蘋果最強的代工廠，是富士康科技，母公司係在台上市的鴻海精密，鴻海在05年分拆一間名為富士康的公司來港上市，亦即是富智康的前身，主要做手機生產，客戶係Nokia及Motorola，當日喬教主的iPhone仲未面世啊。iPhone興起後，富士康就被人納入蘋果概念股內，但實情係，自Nokia等公司沒落後，公司主要客戶已轉為國內手機公司，近年的大客仔係華為及小米。在2013年，由富士康改名為富智康，似為釐清關係，但你只要在google搜尋富智康及蘋果，仍然會看到，年頭仲有股評人當佢係蘋概股，早幾日蘋果話來年iPhone產能會增三成，亦見內地財經傳媒將富智康拉埋嚟講。
講完笑話就入返正題，富智康雖常被人誤解，但以業績透明度來說，實在令青冰尊敬，8月公佈的半年業績竟然有64頁，當中不乏有用的資訊，由客戶關係、如何在生產線應對疫情、至手機同業的財務表現都有論述，雖然客戶及同業都無開名，但只要你對手機股有少許認識，都不太難估。而手上的投資亦大方地講出來，其中入股過兩間印度公司，分別係電商Snapdeal及社交app開發商Hike，如果日後這些公司能夠上市，或是富智康的金蛋。
公司在11月公佈過首三季的營運數據，收入降4成，虧損1.2億美元，更詳列7大理由解釋，國內手機業不景及主要客戶被制裁等，在本月初再發盈警，指本年度虧損將比去年更多。照表面看富智康經營困難，但有趣地，公司在季績及盈警後出手回購，加上現時市賬率只有0.45，日後如選擇退市，棄港回A都係一個出路。
青冰