周三英聯盃八強賽事，愛華頓主場迎戰曼聯賽前，愛華頓主帥安察洛堤就爆料，話七年前曼聯傳奇領隊費格遜退休時，曾經邀請過佢接掌紅魔鬼，不過肥安最終婉拒咗費Sir嘅邀請，決定去西班牙執教皇家馬德里。肥安向傳媒表示，12/13球季完結前，當時費Sir已經向外公佈球季結束就會退休，仲開始為招攬接班人做準備，當時費Sir就邀請過佢咁話：「我同費Sir一直保持非常好嘅關係，喺佢決定退休後我哋見過面，佢問我會唔會考慮接掌曼聯，不過當時我同皇馬已經有一定程度嘅共識，所以婉拒咗佢嘅邀請，但我非常感激佢。」肥安之後喺皇馬都交到貨，帶住基斯坦奴朗拿度、加里夫巴利同埋莫迪歷呢班巨星，第一季就帶領皇馬喺歐聯決賽加時贏咗死敵馬德里體育會捧盃，但如果佢去曼聯嘅話，就係帶住朗尼、卡域克同傑斯呢啲高峯已過嘅球員，相信成績都好唔得過莫耶斯幾多囉。其實費Sir喺2015年出版嘅自傳中就有提過，喺決定莫耶斯接班前，佢認為安察洛堤係執掌曼聯嘅理想人選之一，不過當時已經清楚對方將更大機會執教皇馬，「摩連奴當時已經答應阿巴莫域治再教車路士，相信安察洛堤會去皇馬。」同時，書中亦有提過，曼聯當時聯絡過高普、哥迪奧拿同雲高爾，但三人同樣因為有合約在身未有答應，當中雲高爾就喺2014年決定執教曼聯。