中國家電巨頭海爾智家（6690）終於完成換股私有化港股上市企業海爾電器（前1169），並以介紹方式喺港交所（388）主板上市。兩者正進行多項關聯交易，目前海爾電器從海爾智家購入大量製成品，用於其渠道服務業務。對於海爾集團嚟講，咁樣嘅業務分離，以及多項關聯交易進行導致生產、管理、銷售等環節產生斷層，影響整體經營效率。
海爾智家跟海爾電器嘅結合將對集團未來戰略規劃提供更有效實施環境，並發揮協同效應，從而進一步提升統一平台嘅資源配置效率；跨品類且全流程亦將得到整合協同，兩者共享智慧家庭業務發展平台，放大集團戰略價值。私有化完成後，海爾智家及海爾電器亦將更有效改善股權及管理架構，實現管理團隊、員工、股東一致利益，有利於帶動戰略執行力提升。此外，海爾電器將能夠全面整合至「體驗雲」平台，以進一步提高設備間嘅連接性，並提升用戶體驗。
呢種雙贏嘅整合除咗獲得提升運營效率，仲可以大大提升海爾智家嘅利潤水平，在盈利能力上與美的集團和格力電器的差距將有所收窄，淨利率有望得到較大幅度提升。此外，海爾智家仲將得以實現資金統一管理及籌劃，減少紅籌架構下產生嘅額外分紅稅負，從而優化資金配置，提升資金使用率。
重組成功後，海爾智家將成功搭建「A+H+D」嘅全球資本市場平台，海爾集團旗下家電業務以一個整體形象喺港股亮相，海爾智家或將被重新估值。外資當中以麥格理率先發表海爾智家報告，不僅給予其跑贏大市評級，12個月目標價更相當進取定於41.7元，即使折讓三成計算，海爾智家亦可見29元水平，現價買入，跌穿24元止蝕，有數得計博得過。
古天后