喺建制派圈子中人人得宜避之嘅「戰狼」何君堯，幾個月前話同中聯辦見完面整合咗「三座大山」，包括整頓司法界、教育和社福界，佢噚日終於有行動啦，宣佈有人肯贊助佢兩年前創立嘅「國際公益法律服務協會有限公司（IPLSA）」，之但係呢單野背後嘅「金主」原來係「新香港人」，背景仲好似幾複雜。
「何已完」個「金主」叫曹福順，「新香港人」一名，仲係用普通話講嘢，佢十年前由喺大陸嚟香港，噚日同「何已完」一齊現身時自稱退休人士，但其實佢係「中國再生醫學（8158）」前執董，上年港交所就發過新聞稿，譴責佢同多名董事涉及未披露動用資金提供貸款，仲要佢同其他董事接受再培訓。
不過，噚日有記者追問有關問題時，就有「何已完」撲出嚟「護（金）主」，亦唔肯講自己收咗對方幾多錢。八方噚日仲有睇過立會個議員利益申報紀錄，就未見「何已完」有做呢個申報。
咁究竟個「國家安全教育中心」做啲咩呢？佢哋2021年工作計劃包括推動司法改革運動係「具體要點」，認為要將司法人員推薦委員會染紅，加入一個港區全國人大代表同一個港區政協委員，支持愛國者做法官；呢份計劃書文件係用簡體字寫嘅，仲唔係為咗畀西環睇？
李八方