外電報道，國際足協（FIFA）已經向瑞士蘇黎世檢察機關作出舉報，指控涉及貪腐醜聞而喺2015年落台嘅FIFA前會長白禮達，喺任期時管理不善，令FIFA蒙受巨大經濟損失，懷疑當中涉及刑事罪行。FIFA發聲明話，佢哋喺蘇黎世成立博物館嘅項目，涉資5億瑞士法郎（約43.8億港元），但上手管理層竟然畀咗1.4億瑞士法郎，為一座唔屬於FIFA嘅物業翻新同裝修，仲同業主簽訂咗份租金高於市值、對FIFA相當不利嘅長期租約。佢哋仲話份租約要到2045年先到期，租金就高達31.4億港元。白禮達已經透過律師強烈否認指控，仲話有關說法冇根據。FIFA博物館座落喺蘇黎世，佔地10樓層，共3,000平方米，項目喺2013年展開，博物館喺2016年2月正式揭幕。