【娛樂人物】現年23歲的余潔滢（Zoe）的確跟年長四年的家姐余香凝（Jennifer）十足孖生姊妹一樣，連異性緣也一樣超旺。最近Zoe便跟拍劇拍檔、Mirror成員陳卓賢（Ian）傳緋聞，她雖否認，但Zoe以往男友也是運動健將，兼且她又不抗拒圈中人，兩人又非全無可能。Zoe指香港男仔欠主動又遲鈍，若遇到心儀對象，她不介意先做主動示愛。
撰文：寶妮
攝影：仇志德
余潔滢近日跟Mirror成員陳卓賢因合作ViuTV劇《男排女將》而傳緋聞，她已即時否認，跟男方劃清界線。不過日前Zoe在尖沙嘴接受《蘋果》專訪時，仍大方讚Ian是個好對手：「第一次同Ian合作，之前同佢唔識，好彩佢份人好nice，大家都係慢熱嘅人，同埋佢好聰明，佢同自己都夾得好好，對手戲有火花又搞笑。」
Zoe回想第二日開工便要跟Ian拍談情戲，劇情講述男方向女方表白，她笑說：「嗰陣我同Ian都傾唔夠十句偈，大家真係有啲陌生，次次拍時導演都有啲激動咁話要有戀愛嘅感覺，佢話完全感覺唔到我哋好sweet。」結果NG了幾次之後，為了加快入戲，Zoe回想自己拍拖時的甜蜜感覺，最後總算順利過關。
劇中Zoe飾演的「安安」亦有主動向飾演「魚仔」的Ian示意，現實生活中Zoe坦認自己亦表現主動：「以往好多都係自己做主動，香港男仔好怕醜又唔主動，如果我鍾意佢，而我又感覺到佢都鍾意，但如果自己唔行出第一步怕會錯過，因為有時啲男仔好遲鈍feel唔到。」她坦言中學時及初出來工作後的兩段戀情，皆由她先向男方示意，讓男方有信心踏出追求的第一步，她還笑說：「次次都成功，未失敗過。」
家姐余香凝早前忽然結婚，更盛傳雙喜臨門，Zoe會否有機效法家姐一樣閃婚加早婚？她謂：「𠵱家對我嚟講係有排，我唔係一個set日子目標結婚嘅人，一切順其自然，有就有冇就冇，所以真係唔知，講唔埋，但𠵱家呢刻係事業先。」
只不過Zoe聲稱現在單身，若想要家姐的幸福生活看來要加緊努力，談到擇偶條件，Zoe稱：「冇乜特別外形或者條件嘅男仔，但一定要有特別嘢吸引我。我唔會鍾意坐office朝九晚五嘅人，因為生活太正常。我唔鍾意太死板嘅人，因我係好多鬼主意嘅人，不過以往我鍾意嘅男仔都鍾意運動，而我亦唔抗拒圈中人。」Ian曾是香港男子排球代表隊隊員之一，又是圈中人，若果他是單身，正正符合Zoe的條件。
場地提供：The ONE
服裝提供：Ireneisgood Label
