L太太好心思，送來一包食品，皆香港土產名物，做冬之夜因食「唐人館」盆菜兩鍋，已經食到捧肚，趁今星期在家休息，次日逐樣品嚐。十款之中，畢明推介之法國有氣酒，已在冬至晚飲清光，事先照指示，先冰藏五小時，晚飯前開瓶，斟落酒杯15至20分鐘後才飲，確如指示所言，溫度稍升，越喝越甜，正到無倫，唔怪得飲家偶像畢明推介，要再去酒舖搜購之：Clement Klur NV Cuvée MEOW, Cremant d’Alsace。
次日下午吃永樂粉麵特製濃蝦子麵，話明用蝦子、大地魚及各種海味熬三小時成濃湯底，加上蝦子、雞蛋、粉麵製成，太太吃了一碗，即叫左丁山按照包裝盒上之電話打電話去訂麵，照電話號碼2759 ×××1一撥，對方聽電話好晦氣，叫收綫，左丁山莫名其妙，以為自己肥手指，㩒錯電話，於是再打一次，更被對方罵一句。冇理由咁冇禮貌㗎？左太認真心水清，用手機上網查證，哎吔！原來包裝盒上的電話號碼係印錯咗，確實電話係2759 6581，唔知道永樂粉麵知唔知呢？咁就難怪聽電話之人鬼咁𤷪𤺧，一定係每日收到好多電話訂貨也！於是再打2759 6581一次，呢次對方好客氣嘞，話買滿三百元可以送貨！
晚飯時蒸臘腸，乃錦祥號鮮肉腸皇，錦祥號係逾60年老字號，專幫名店代製臘腸，標榜天然腸衣，冇防腐劑，一成肥肉九成瘦肉，蒸好一吃便知龍與鳳，幾十年來未吃過如此正斗臘腸，左太又立即上網一查，知道錦祥號工場在西環，又叫左丁山去買。
飯後吃甜品，尖東帝苑酒店之蝴蝶酥有名廚Gregoire推薦，顏色靚，鬆脆恰好，不太甜，好味道，呢樣帝苑酒店蝴蝶酥，左丁山經常買到，只是不知有名廚推介，入選本地食品名物而已；至於趣香蝦子花生，其奧白芝麻花生糖，送咗啲畀最鍾意吃小吃嘅大編輯，好快就收到短訊：「咁鬼好食，仲有冇！」冇咯，女婿食到停唔到嘴，左丁山驚執輸搶番幾件入口，孫兒又伸手埋嚟攞，梗係要麻煩左太上網查一查去邊度買得到啦。要多謝L太送來如此好吃之「本地有好嘢！支持香港製造／品牌」！