早排喺社交網絡公開表明自己身為中國人而心存感激嘅香港藝人周柏豪，近日獲陳百祥邀請去到親中網媒做訪問，呢位藝人喺訪問入邊一跪再跪，基本上透過今次訪問公開轉投藍營。至於家陣效力緊英超球隊阿士東維拉嘅英格蘭球星基亞利殊，一直以嚟都因為同周柏豪個樣有幾分相似，所以被港人稱為「維拉柏豪」，由於周柏豪為咗人仔而洗底轉投藍營，就連香港維拉球迷會都睇唔過眼，即刻喺facebook呼籲球迷咪再叫基亞利殊做「維拉柏豪」。
本來一直被視為「暗黃」嘅周柏豪，之前就因為一張多年前同黃之鋒嘅合照，所以一直都俾小粉紅狙擊。近日似乎要正視聽多次公開表忠，又話感激自己係中國人，仲要通關之後即刻撲返大陸，希望可以藉此挽回自己喺大陸嘅名聲，被外界抨擊佢抵受唔住人仔嘅誘惑。
手機用戶請按此放大圖表
不過周柏豪今次嘅跪低舉動同放棄本土市場冇分別，之前一直都有份支持香港人抗爭嘅香港維拉球迷會，禮拜三就喺社交網站上邊同周柏豪割席，同時希望各位球迷以後叫番基亞利殊原名，唔好再叫做「維拉柏豪」：「真心希望大家希望大家唔好再叫佢『維拉柏豪』喇，請叫佢基利殊（基亞利殊）Jack Grealish。」之後仲加埋「he is super jack」同「兩個層次」嘅hashtag，強調基亞利殊同周柏豪兩個人並唔能夠相提並論。
維拉球迷會出post發聲之後，一共獲得超過1,000個讚好，仲有超過200次分享貼文，當中包括前有線體育主播陳漢威亦留言：「以正視聽」。就算球迷有各自支持嘅球隊，但其他香港英超球迷組織都連成一線，包括利物浦球迷組織「那些利迷的紅色日記」、韋斯咸球迷組織「鎚仔幫主場」、熱刺球迷組織「迪里熱吧」等，都有喺維拉球迷會下邊留言圍插周柏豪，甚至就連遠在澳門、英國、澳洲嘅香港球迷組織，都留言恥與周柏豪為伍。除咗一眾球迷組織之外，都有波衫舖分享貼文，再借機會抽水一番。
雖然人人都知基亞利殊嘅私生活唔算太過檢點，今個月仲因為兩條不小心駕駛罪成，被罰款82,000鎊（約85萬港元）兼停牌9個月。不過呢位25歲英格蘭國腳一直都未有為咗錢而加盟大球會，作為維拉嘅青訓產品兼球隊隊長，上季幫助球隊護級之後，今季12輪聯賽已經交出5入球7助攻嘅成績，擔起球隊進攻大旗。雖然近期英國傳媒報道，除咗曼城同曼聯準備喺下月轉會窗重開求購基亞利殊之外，就連利物浦都關注緊呢位中場嘅情況，只不過基亞利殊喺今年9月先同維拉續咗5年新約，所以球會都冇打算咁輕易放人，報道話最少要收到1億鎊（約10億港元）先肯畀佢走，恐怕疫情之下都冇乜球會出到呢個價錢。