現年36歲的周柏豪去年因公開表態而被內地封殺，近日他獲邀演出內地跨年騷，但卻被小粉紅狙擊。為此他日前先公開感激是中國人「表忠」，繼而前日再接受撐警陳百祥訪問發表「孝順阿媽」言論媚共，結果全城怒插，深黃杜汶澤嘲笑他超越余文樂，阮民安更斥他為賺人仔可以去到幾盡。
無綫「星夢一哥」周柏豪早前獲邀參加內地網上娛樂平台「bilibili」（簡稱B站）的跨年晚會，但卻被內地小粉紅狙擊阻止他參加，他繼日前於社交網自稱感激是中國人來「表忠」後，前日再出招找來「撐警」陳百祥，在親中網媒讓他再次公開其忠誠，即被藝人及網民鬧爆，群情洶湧。
訪問開始周柏豪與「星夢一姐」菊梓喬已擦鞋大讚B站平台及內地發展快，大開眼界及以國家為榮，柏豪亦有分享成為人父的心情及囡囡的日常，接着陳百祥開始入正題為柏豪「洗底」，柏豪即低頭重提日前指感激是中國人的帖文，他強調網民有誤解：「我做藝人，只想唱好歌帶娛樂畀觀眾。」他自言遇到不懂解決的事情便會「收埋」自己，以為可慢慢變淡，之後指「原來呢個年代係唔可以」，故現在才勇於講出自己感受。
此時陳百祥把話題拉到去2014年周柏豪跟黃之鋒的合照，他聞言即說：「我當然唔同意佢（黃之鋒）嘅做法，搵其他國家嘅人嚟制裁，係呀，自己同阿媽嘈交，冇理由搵隔籬屋個師奶嚟打自己個阿媽嘛，點都係自己同阿媽傾好佢，咁本身都要聽阿媽話，呢個『孝順』，我係一定要提出，所以係完全唔同意佢嘅理念同做法。呢個係我立場，同埋我完全反對暴力行為。」及後他再解釋跟黃之鋒的合照為當年紅館個唱後台拍攝，他指有些人會帶朋友到後台影相，即使知道對方是甚麼人也不會拒絕。尾聲時問二人對年輕人訴求及行為有何睇法時，柏豪指他們可能因未了解內地才產生誤解，菊梓喬則避重就輕說只希望年輕人以正能量去追夢，而柏豪之前發表偉論時她亦一臉嚴肅，沒有插口發言。
其實柏豪今年工作少之又少，當中固然受疫情影響，但今年他剛誕下囡囡兼要養家供樓，因此難怪要公開表忠來賺「人仔」，而黃絲藝人之一阮民安昨在fb爆粗：「佢真係為咗人民幣可以去到幾咁盡？深喉咁！係咪入咗無綫，就搞到你戇XX咁呢？人民幣唔會畀你賺得幾耐！」杜汶澤亦忍不住在fb「讚」周柏豪，指他終超越假想敵的「媚共」余文樂：「係叻仔嚟，好有志氣，未紅嗰陣已經好想做余文樂，跟得好貼，甚至想超越佢。今日佢終於做咗，樂仔你要加油呀！」
另外，王宗堯也在fb有感而發：「做戲前真的先要做好一個人，絕不可為搵食賺錢，屈就自我、模糊道德，做事沒底線。」而前港姐譚小環老公渣哥亦發聲說：「記得帶個女去大灣區接受教育，唔好去外國搵人哋阿媽，香港人嚟緊幾十年會睇實你，最後因為渣哥係斯文人，只能禮貌地同你講聲：Hi，你好，XXLM！」另外梁芷珊、詹志文、羅冠聰及盧巧音老公Sammy等也公開批評周柏豪，其中羅冠聰指出：「明明以他的地位，是否北上都只不過是大賺特賺和盤滿缽滿的分別，有必要因為如此貪念來放棄自己的聲譽，附和那些小丑嗎？」
大批網民紛紛到柏豪社交網及其自家服裝品牌官網留言痛斥：「出賣香港人為錢舔陳百祥鞋底！食屎啦唔好懶型喇，你形象已經徹底收皮，躝屍趷路去微博啦，用乜嘢美帝facebook呀？」甚至連被指媚共的楊千嬅也一同被鬧。網民更在社交媒體發起unfollow潮，連藍奕邦也和應。昨早柏豪的Ig原有約152萬個followers，但到昨晚八時許已跌至149萬，足足少了近三萬人。
