利物浦中堅華基爾雲迪積克（VVD）自從10月中對陣愛華頓嗰陣俾比克福特整傷十字韌帶後，早前一直有消息話呢位荷蘭中堅要提早收「咧」。不過近日VVD就喺ig分享咗自己嘅康復進展，睇得出呢位紅軍中堅嘅康復速度比想像中快，相信唔少利物浦球迷都樂於睇到呢個畫面。經過手術後嘅VVD，早前一直喺紅軍新訓練基地度做恢復訓練，由佢禮拜一上載嘅影片見到，佢𠵱家已經可以喺gym房做大量訓練之餘，亦都做到簡單傳波，考慮到之前受過重傷仲做埋手術，兩個月後就好得咁快，真係令人驚訝。利物浦對VVD喺今季剩低時間復出都幾樂觀，認為佢可以喺完季前就踢得番波。由於十字韌帶受傷後好難好番，假如VVD真係可以提前復出，相信都算係一項壯舉。