港版國安法生效之後，說好的香港人言論自由會受保障，但事實係搞到人人自危、為免麻煩於是索性自我審查，好似早陣子網媒「香港獨立媒體網」就改名為「獨立媒體」避險。最新一單，八方聽聞即將舉辦到第十三屆香港獨立電影節，就因為有「香港獨立」四字隻，印宣傳品時遇上阻滯，印刷商接咗生意都打回頭拒印。
八方唔想畀人扣帽子，亦驚國安處POPO文化水平難以理解件事，所以要事先講清楚，就係「香港獨立電影節」同「香港獨立」完全無關，「獨立」兩隻字係講緊電影，即係指製作過程大部份或完全獨立於主流電影公司嘅劇情片，而香港獨立電影節由獨立電影人組成嘅非牟利團體影意志舉辦，由2008年開始，仲試過衝出香港變香港亞洲獨立電影節，唔通當時係講亞洲獨立咩？
雖然成件事唔關政治事更涉及國家安全，但港版國安法就係會造成寒蟬效應同白色恐怖，所以有人會驚囉，有黃店印刷商發現呢張單有佢哋以為好敏感嘅字眼後，明明收埋定金都反口唔接生意，寧願退定，亦唔接受影意志提出嘅解決方案，包括油咗有關字眼等方法都唔得，實行割席保平安。
呢件事喺網上傳開後，八方見網民紛紛獻計，有人介紹印刷商，有人甚至提議不如大家幫拖用手印，亦有人話之前搵印刷商印十二港人文宣都有類似經歷，呢個咪就係今日香港囉。其實我哋唔止有獨立電影，仲有香港獨立音樂，同埋特區官員成日強調嘅香港獨立關稅區，唔知官員又敢唔敢講，香港獨立關稅區係出入口貿易嘅唯一出路呀？
李八方