皇家馬德里前鋒賓施馬打破「美C」11年嘅壟斷，贏得《馬卡報》頒發嘅19/20球季迪史堤芬奴獎，即西甲上季最佳球員獎項。過去11季，呢個獎項都由巴塞隆拿球星美斯同前皇馬隊友基斯坦奴朗拿度兩人包攬，美斯贏七次，C朗亦四次當選。對上三季，呢個獎項都落入美斯手中，今年終於再有皇馬球員榮膺呢項殊榮，賓施馬亦係繼07/08球季呢個獎創辦時首位得獎者魯爾後，另一位「美C」以外獲獎嘅球員。賓施馬上季西甲射入21球，今季入咗七球，只係少過維拉利爾前鋒謝拉特摩蘭奴一球。另外，佢仲喺一周前超越卡路士，以529次成為皇馬史上披甲次數最多嘅外援球員。另外，皇馬教練施丹同門將泰拔高圖爾斯亦分別獲得最佳教練同最佳門將獎項。