【姐匙Talk】猩猩加戲暗黑不滿蝕底

眾所周知娛樂圈係是非之地，但係咪以為只係得女藝人先多是非，有時候遇着啲斤斤計較嘅男藝人，製造是非嘅威力，一啲都唔輸蝕。好似「暗黑」之前因為拍親熱戲嘅問題，同「猩猩」搞到有啲唔開心，暗黑同啲朋友吐苦水，話唔明白點解喺套劇入面要無端端加親熱戲，就算扮緊兩公婆，都唔使無時無刻咁親熱，搞到佢好困擾。

老羞成怒唱衰拍檔

點知呢番說話傳咗出去，猩猩聽到之後老羞成怒，打電話鬧爆暗黑抹黑自己，聽講仲為咗呢件事，猩猩周圍唱暗黑，話佢啲工作態度好鬼差，平時做人點樣乞人憎，最後事件驚動到高層，就要佢哋兩個封嘴，唔准再講呢件事。

查實猩猩平時做人都鍾意扮嘢，又意見多多，做人做事都懶有原則，稍為睇人哋唔順眼，即刻扮晒出嚟話畀人知有幾咁唔鍾意，所以呢件事都有唔少人戥暗黑唔抵，蝕底咗仲要畀人唱，好彩暗黑覺得既然唔可以再提，就索性當猩猩透明，少啲來往就避免麻煩。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。