現年37歲的趙式浩（Howard）是84歲百億富豪趙世曾的長子，父親風流大半生，抱不婚主義，膝下三個子女式芝、式浩和式正分別跟不同女友所生，而趙式浩亦曾被指遺傳其父風流個性，未夠30歲已與前女友Winnie Liu未婚誕下一子趙子勤。日前Howard接受《蘋果》專訪，就笑言：「出世第一日開始，我嘅原罪就係花心。」
父親多姿多采的私生活，作為兒子不敢評論太多，但Howard認為外界對趙世曾有太多誤解：「成日聽到人話有錢佬咩咩咩，但其實佢後生時好勤力打拼，辛酸唔通同你講咩。我覺得結唔結婚睇個人性格，對小朋友嚟講，當然想有完整家庭，但我都寧願要一個單親家庭，好過要見二媽、三媽、四媽，甚至對簿公堂。自己年紀大咗，睇番都啱，既然佢唔想定，就不如唔好定，投契就一齊，冇人攞刀『行』住你，想有小朋友就有小朋友，不負於另一半。」
其實Howard今年決心定下來，跟NowTV的新聞小花廖康如奉子成婚，再誕一子，認為這是人生必經階段。Howard透露二人在活動上認識，太太是政治版記者，接觸很多商界名人，思想比同齡女仔成熟，而且是個工作狂，他說：「冇叫佢唔好做，因為唔做嘢會同社會脫節。佢係政治版，去年社會運動都有落實地採訪，出過事，危險㗎。當時有同佢嘈過好多次，但冷靜落嚟，明白佢係熱愛呢份工，做到一個中立而且專業嘅記者。講真做傳媒人工唔係特別高，起碼今日唔需要靠份糧支撐屋企，鍾意就繼續做，唔鍾意都有好多選擇。」
Howard自言亦非大眾想像的「離地」富豪第三代：「屋企好push我哋，唔係細個就可以『un un腳』，喺外國讀書時，屋企只會畀到基本生活費，要同朋友去旅行或食飯，就要自己打工，我都做過旅行社、銀行、補習社。男仔應該要硬淨啲，我大仔同個ex（趙式浩前女友）一齊住，我都覺得佢應該要學習獨立啲。」他擁有房地產管理學碩士學位，畢業返港第二日，已被安排返工打理家族生意，「好記得嗰日係漁人碼頭開業日子，同老竇食完餐飯，就叫我聽日返工做乜做乜，兩年後叫我『生生性性』畀個董事你做，準時返工，但其實我好早㗎嘞，係佢個鐘校快咗15分鐘啫，對我哋好有要求。」
2011年，Howard自言受馬雲一番說話影響，決心走出「comfort zone」自立門戶，他承認一開始是「靠父幹」，但現在生意基本已上軌道：「我又唔係好似佢（父親）投個百幾二百億項目返嚟，都係做一啲拼購舊樓或基金公司嘅生意，過程幾辛苦，但亦係好好嘅磨練。如果有一日爸爸想我返去（卓能）做多啲，或將來我將自己生意交畀下一代，總之呢段時間學到嘅都係無價。」現由家姐趙式芝接父業，成為卓能集團副執行主席兼執行董事，而Howard則是公司的非執行董事，問到可擔心未來有爭產糾紛？他輕描淡寫說：「神自有安排。」
撰文：嵐山
更多精采時尚內容，盡在http://add.appledaily.com。