「武漢肺炎」呢四隻字喺中共眼中，似乎仲恐怖過隻病毒本身，皆因會令人清楚知道病毒係邊度源頭，自信返咗嚟嘅777亦為咗緊跟黨走，為表忠誠當然要追隨大外宣主旋律，早前下令禁止記者喺政府記者會用呢四隻字提問，甚至話可以趕人走。《蘋果》記者日前喺衞生署記者會上用「武漢肺炎」提問，就俾新聞官「提醒」要用中國官方用詞「新冠肺炎」，直線示範愛國同政治正確，絕對重要過新聞同言論自由。
不過，唔可以污名化呢樣嘢，原來只適用於中國，其他國家就可以繼續「污名化」！仲要由特區政府自己帶頭，示範點樣可以肆無忌憚污名化外國！食衞局局長陳肇始噚日開記者會，講到變種嘅「新冠肺炎」，左一句「英國病毒」、右一句「英國變種病毒」，完全唔覺有問題。
其實呢隻新變種病毒係有名嘅，英國公共衞生部門將最新發現嘅病毒株代號定為VUI – 202012/01，代表當局於2020年首個調查嘅變異株，連同陳肇始一齊出席記者會嘅政府專家顧問、港大醫學院院長梁卓偉，都係用「N501Y」學名稱呼變種病毒株，但陳肇始就係刻意咁提「英國」，究竟係公然歧視英國，定係想引發外交風波先？至於曾經話「武漢肺炎」係污名化製造仇恨嘅平機會主席朱敏健，請問又幾時出聲批評陳肇始公然製造歧視、分裂及仇恨呢？
李八方