亞冠同日職曲終人散，之後我會講多啲澳職，不過下星期先開「咧」，今次就講吓小弟都有評述開嘅意甲。意甲周中就有聖誕快車，星期二焦點，大家都睇住祖雲達斯主場對費倫天拿，不過我反而對克羅托內主場對帕爾馬有心水，事關兩隊之前都評述過。
克羅托內以「升班馬」嚟講，沉到去榜尾，就真係冇咩好講，帕爾馬今季其實整體發揮唔太差，三線都平均，謝雲奴（圖）有入波保證，上場對祖雲達斯輸四粒無話可說，不過之前五場不敗，馬會開平手盤，一定要客隊。
星期三選擇就多好多，維羅納主場對國際米蘭，兩隊嘅分野就係國際靠個人質素，維羅納就靠整體性。個人質素上，國際嘅前鋒拿達路馬天尼斯近乎完美，但夾住個自以為完美、不過好敗家嘅盧卡古，完全俾佢害死，對住後防線差啲嘅球隊就恰到人，但當對手整體性好，盧生真係影都唔見，主隊今次有機，信心飛下盤。星期三另一場AC米蘭對拉素，「呂布」效應令上季表現平平嘅米蘭變成龍頭一哥，以榜首姿態對拉素。拉素雖然係一支我幾鍾意嘅意甲球隊，但今季好明顯下滑，寧買當頭起，莫買當頭跌，繼續追米蘭，唔好停。
文：黃耀富
截稿前馬會尚未開盤，盤口僅供參考，讀者記得留意足智彩網頁。
克羅托內月中擊敗史柏斯亞才取得今季首場勝仗，6次主場聯場全部有失波。