武漢肺炎襲擊全球，英國政府更因對抗變種武肺，宣佈倫敦由20日起升至封城等級，如非必要禁止進出。香港有不少藝人的子女都在英國留學，包括DJ森美和才女梁芷珊、黃秋生及邵仲衡等，森美兒子早前以狀元成績考入當地學府，難怪為人父親的森美憂心忡忡指：「擔心佢返唔返到去。」梁芷珊的女兒羅樂桐（Eily）亦已返港，問到女兒會否返英時她說：「如果情況嚴重，學校lockdown就遲啲返去嘞。」
武漢肺炎變種病毒在英國大爆發，香港政府昨日下午宣佈，今日午夜起暫停來港的所有英國載客航班抵港。而英國首相約翰遜（Boris Johnson）前日亦宣佈，倫敦和南部大部份地區的防疫措施級別，由現行最高的第三級，提升至新設的第四級，相當於11月實施的「封城」等級，非必要商店、髮型屋、室內康樂場所前日起須暫停營業。約翰遜表示，第四級疫情警報地區居民不可到其他地區旅遊，其他地區居民也不可進入第四級地區，不少倫敦人昨日趕尾班機大逃亡到其他地區。
森美的長子梁曦樂去年在英國會考GCSE中考獲11科A*佳績，入讀寄宿學校協和學院（Concord College），對於英國宣佈封城，森美昨日接受《蘋果》電話訪問說：「返咗香港啦，聖誕節前返嚟，隔離咗兩個星期，已經出咗隔離酒店，喺香港再留多兩個禮拜。唯一擔心係睇佢返唔返到去，不過𠵱家都未返，過多一個禮拜先考慮，𠵱家密切留意情況，因為新聞啱啱出，要考量吓，雖然話傳播力廣，但希望冇咁嚴重，等過多一個禮拜，睇情況再決定。」據知曦樂即將考A-level，而入大學要靠A-level成績，森美指如果英國取消公開試的話，兒子就不用回英國。
而梁芷珊與前夫羅傑承的女兒羅樂桐（Eily）前年在英國IGCSE獲11A佳績，同樣留在當地讀書，芷珊昨日在電話說女兒已返港：「其實佢係放聖誕假，Tier 2（第二級別）封城時學生都返晒屋企，佢哋留喺宿舍都冇意思，所有堂都可以online，所以佢早咗返嚟，已經返咗嚟隔離完晒好耐，返唔返去睇情況，因為佢嘅課堂係繼續online上，如果情況嚴重，學校lockdown就遲啲返去嘞。」
黃秋生昨日接受《蘋果》訪問，講到英國倫敦因疫情嚴峻封城，被問到會否擔心在彼邦生活的囝囝William時，他以短訊回覆《蘋果》透露，William並不是住在倫敦，是離開頗遠的鄉郊地方，人口並不稠密，所以不太擔心。
邵仲衡的母親、弟弟及兒子都在英國，他昨日回覆《蘋果》時說：「今朝打咗畀媽咪，佢住西南部，情況冇咁嚴重，佢哋嗰度第一級，又去番疫情嚴峻時咁，限制出街買嘢。有時訂咗嘢就放門口，樣樣打回原型，新病毒變種，比舊嘅傳播多70%，都提家人要小心。」曾在英國讀書的麥明詩，原本都有幾位朋友在英國工作，她說：「好彩嗰幾位朋友10月都返咗嚟香港，準備同屋企人過聖誕，現在可以遲啲先返過。」