聖誕臨近，餐廳R一年一度請幾位老友吃聖誕午餐，只是兩人一枱，吃得冇去年咁過癮，今次係去銅鑼灣利園二期地庫嘅The Cellar，入口在名店Piaget旁邊，有專𨋢去LG（地庫），面積算大，但未有以前在怡和大廈地庫嘅舊店咁大。餐廳R都算大膽，租下呢個前恒生銀行分行嘅地方做餐廳，裝修好晒之後開業，立即遇上晚間禁堂食，真係倒霉過倒霉，佢去年開一間Cadillac，在希慎中心七樓，七月開幕，即時遇上示威一連串，希慎中心經常提早拉閘，人客點上門吖。到後來，示威稍停，Cadillac生意反彈，漸有口碑，去年聖誕十分旺場，誰知好景不常，一過年就碰上新冠病毒肺炎疫情，全港食肆收益插水式下跌，全部變成艱苦企業，唔執笠算好彩。
The Cellar被怡和大廈業主叫走後，到處搵地方復業，今次在利園二期重開，係因為商業大廈地庫玩live music夾band加跳舞，相信冇人會投訴聲音「太大」，根本聲音上唔到地面，以前舊店極受聽爵士樂嘅朋友歡迎，可惜吖，想完全恢復舊貌，一定係望天打卦，要疫情消失，香港政府撤消限聚令，全港恢復正常活動先至得。
在此吃乜嘢好呢？先飲雜菜湯，頭盤有白酒煮蜆，然後來一個小pizza，叫做Pizza No.2，主菜就係羊架，楊社長從將軍澳遠道而來，吃到連聲叫好，最可惜嘅係，楊社長吃到二時過後，不停睇錶，卒之主菜來到，竟要起身鬆人。醫生陳醫務所就在總統戲院附近，下午睇症唔駛急，羊架一入口，就細聲話：「好耐冇食過咁嫩口嘅羊肉，咁鬼靚，楊社長食唔到，走寶咯。」律師W已經升上神枱做律師行顧問（即係唔駛忙），唔駛急住返中環，與餐廳R二人共坐一枱，飲完白酒又飲紅酒，一於慢慢嘆。楊社長冇得食嘅羊架，怎麼辦？碰啱左丁山自費叫外賣Pizza No.2，Pizza Margherita及Italian Meatball回家畀孫女及家人食，餐飲M索性將剩餘之羊架畀埋左丁山拎返屋企，楊社長想食正嘢，下次要自己自費嘞！左丁山多謝餐廳R之餘，叫佢快啲去申請抗疫基金第4期，餐廳R嘆曰：「杯水車薪，好過冇啦。」咁又係，長貧難顧，不能長期向政府伸大手板，政府亦要計住財赤，但政府總要拿出辦法來控制疫情，否則高官請讓位，讓有能者居之。