正義聯盟創辦人、「愛字頭」名人李偲嫣因感染武肺死亡，佢嘅好友、經民聯立法會議員梁美芬噚日就幫佢出頭，話李偲嫣同佢老公謝鋮浚交咗檢測樣本成10日，到𠵱家都未收報告，搞到佢兩公婆一直以為自己冇中。梁美芬火滾話𠵱家有人死咗，要有人問責，不過即使你係藍絲，班官都係一樣唔使問責！
梁美芬係噚日立法會財委會上面講，佢收到李偲嫣老公謝鋮浚嘅短訊，話自己同老婆今個月10日其實已將檢測樣本送咗去元朗容鳳書母嬰健康院，到噚日超過咗10日仲未收到結果報告，梁美芬話就係因為咁，搞到佢兩公婆以為自己冇中武肺，搞成咁究竟係邊個嘅失誤？又鬧埋食衞局長陳肇始，不滿佢賴衞生署冇主動講人手不足，「咁你（陳肇始）做咩局長啊？」仲講明呢件事「一定要有人問責！」
不過一講到要人問責，唔理死嘅係藍絲定黃絲，班官係一視同仁唔會負責！食衞局副局長徐德義第一句就梗係「我哋要去跟進」、第二句就係「睇吓發生嘅事實係點」，即係乜都冇答！搞到梁美芬好火滾，鬧徐德義嘅答覆好涼薄，仲話起碼要有人道歉，同埋有人要問責！仲鬧777政府抗疫表現自滿、自大、不作為，形容「民怨已演變成民憤、天怒人怨」。梁美芬噚晚亦同傳媒透露，謝鋮浚噚晚證實確診，已由檢疫中心轉送入院治療。
李八方