一百八十年前，香港開埠，只係眾多亞洲外治港口城市嘅其中一個，同類嘅仲有孟買、加爾各答、馬六甲、檳城、上海等等。
到咗二戰，中国裏面嘅同類，已經移交返晒。至於中国以外呢？二戰時期，英歐勢力，喺亞洲戰場完全頂唔住日軍，就算之後日本敗走，殖民政權回歸，外國勢力已進入最後倒數。
同一時間，民族建國喺亞洲如火如荼，接殖民政權嘅棒。印度、印尼、馬來亞相繼立國。原本獨立於內陸政權嘅殖民港市，喺反帝反殖嘅旗號底下，變成X英餘孽，被溶咗入內陸，當然冇運行。
只有兩個例外。一個係入咗馬來亞，但瞬間俾人踢返出嚟嘅新加坡。另一個，就係香港。喺呢個角度睇，香港二戰後到1997，可以稱為「第一次續命時代」。
喺「第一次續命時代」，其他同類港市，包括響朵過香港嘅上海，相繼落幕。成個區域，只剩低香港同新加坡。
正正喺呢個時代，喺美蘇冷戰，中国韜光養晦扮矮仔嘅背景底下，香港攀升到亞洲國際城市嘅代表，由自由指數，到人均GDP，到文化輸出，同儕已經變成代表紐約、倫敦。
但始終要面對97問題：仲有冇得續？
檳城、新加坡等海峽殖民地，係真係殖民地「crown colony」。上海漢口等等，嗰啲係租界。如果係殖民地，聯合國講到明，去殖之後嘅前途，由當地人自決，但租界就唔包。
香港兩樣都有啲。香港島，1842年一開波就係殖民地。九龍半島，1860本來係租，幾個月就改咗做割讓。但到咗1898嘅新界，竟然係租界。
就係咁，香港由純粹嘅殖民地，變咗一忽殖民地一忽租界。十年之後，發覺捉咗蟲嘅港督盧吉，提議英國用威海衛租界交換，換取新界變埋殖民地，咁就一勞永逸。
但最後唔成事，留咗條尾巴，喺1972年俾新加入聯合國嘅中共，乘乘機機，將香港剔除出殖民地名單。結果新界租約到期日，就成為97問題。
八十年代嘅中英談判，決定咗香港係會以中共拍心口保證，去埋聯合國登記嘅「一国兩制」嘅方式，續命五十年，可稱之為「第二次續命」。原則上，再一次避過溶入內陸嘅一劫。 直到2046。當然，中共嘅保證幾可信，就係另一回事。
第二次續命時代，未到一半，背景已經換成中国夢，兩制變形走樣扭曲到死亡。戰狼外交嘅中国，同美國形成新冷戰，香港成為冷戰角力嘅前線，同儕由紐約倫敦，變成同樣力抗內陸政權大一統主義嘅台灣。
到底香港有乜路徑，可以擺脫被內陸溶咗嘅宿命？共產獨裁固然大鑊，但睇返亞洲前殖民港市嘅下場，就算做到印度馬拉政權水平（過份樂觀），十億八億大中華膠嘅民主中国，會唔會放過香港，絕對成疑。出路，顯然喺框框之外。
撰文：宋漢生
fb : sunghsblog