星期五下午四點幾，在圓方商場外的士站預備搭的士，事有湊巧，居然見到朋友T嘅太太在另一邊落的士，於是行埋去招呼一聲，問佢點解咁快放工嚟行商場，T太哎吔一聲：「呢排係在家工作，有時又要開會，邊度有正常返工放工時間，總之係忙中偷閒，今日偷到個零鐘頭嚟360買啲嘢啫。」開會也者，虛擬會議也，也是在家zoom zoom zoom，T太話得到公司同意，接受政府委任為分區委員會委員之後，久唔久就要開會，聽報告，畀意見，作為政府諮詢所謂「民意」一個過程。T太以前在公司負責與區議員聯絡，向區議員解釋一啲對當區幾有影響嘅項目，故此對區議會運作有認識。點知去年區議會選舉，泛民大勝之後，特區政府改變方針，特意加強分區委員功能，不少「大計」都搵分區議會諮詢，繞過區議會，講得好聽就係多角度諮詢民意，講得衰就係架空區議會，當泛民區議員冇到。
T太話：「當初諗住做分區委員會委員，係閒職啫，公司示意我去做，冇所謂啦，點知依家頻密開會諮詢，當我地係區議員，但我又唔會去接觸區內居民，問佢地意見嘅啫，事實上係我同老公嘅意見，並非居民意見！」講完佢都覺得好笑，話去shopping可以忘卻煩惱。可惜圓方之內有好多阿太在360買嘢，店舖想搵個街坊睇吓都難。
不過分區委員向「區議會奪權」（按：不少落選之建制派區議員獲委任入分區委員會），都係暫時之事啫，睇黨媒大力鼓吹要區議員宣誓效忠憲法，目標非常明顯，就係製造「士碌架」畀泛民區議員，唔宣誓就DQ，宣咗誓咯喎，以後就捉痛腳，隨時話區議員違反誓言，又係要DQ，遲早可以將泛民區議員DQ晒，恢復番民建聯工聯會操控區議會局面。到時分區委員會就再度成為閒職，T太在此過渡時期做委員係被利用一群。講到宣誓呢樣嘢，所有公務員如要繼續出糧，就最好封嘴，不幸被選為選舉主任，更要眯埋雙眼去DQ泛民參選人，上頭有令，只能嗌一聲：「喳」！
睇宣誓儀式，星島日報夠心水清，搵到內地專家批評林鄭在監誓時（政府助理／副局長宣誓），居然站在中間，唔係好似李克強總理主持宣誓咁，係站在旁邊！林鄭以後行事小心啲嘞，一舉一動都有建制派睇到實㗎。