特首林鄭月娥呢排俾建制派放暗箭，話佢抗疫不力係咁插佢，當中最落力嘅係前特首梁振英同一班「梁粉」，包括專欄作家屈穎妍、前新聞統籌專員馮煒光同梁朝行會成員張志剛等。
喺呢個時候，作為梁粉核心嘅財政司司長陳茂波又出嚟拍片，仲粉墨登場做主角，就財政預算案諮詢市民，再加上佢被視為下屆特首其中一隻黑馬，難免有人猜測佢會唔會派糖爭民望。不過有政界中人話，777一定唔會畀佢咁做之餘，波波亦一早預告庫房冇錢，怕且最後正如佢自嘲咁，只係「阿茂整餅」。
繼去年波波喺片尾首度登場爭取曝光後，今年更由宣傳片頭開始就喺造型上落足工夫，佢一邊着廚師制服，一邊惡搞政府宣傳片講：「雞蛋六隻、糖兩茶匙，仲有啲橙皮㖭⋯⋯」，藉住片中嘅一家人講吓有乜「煮意」，hardsell預算案即日起諮詢：「預備財政預算案就好似煮嘢食，唔知你嘅諗法，又點知你嘅口味？」最後再由片中嘅阿伯搞爛gag話：「呢個咪教整餅嘅阿茂？」
不過政界中人話，之前波波暗示過佢有啲派糖建議因唔符合777「理財新哲學」而被ban橋，講穿咗即係777冇喺《施政報告》宣佈派嘅糖，波波都唔畀派，更何況777爭連任在即，豈容波波用派糖收買人心？再者波波之前不斷話派咗3,000幾億抗疫防疫基金，唔可能再大灑金錢，既然連幫中小企都冇錢，即使好多民意要求派錢紓困，波波又點可能派糖畀市民？咁諮詢民意又有乜意思？
李八方