民主派中西區議員黃永志去年成功光復包括中聯辦在內嘅西營盤選區後，落選嘅民建聯社區主任劉天正即刻小動作多多。繼早前屈「暴徒」整爛佢嗰塊其實被風吹爛嘅易拉架後，噚日又屈近日有武肺確診個案嘅均益大廈二期業主立案法團管理委員會「可恥」，話管委會因為政治問題拒絕民建聯將口罩送到住戶信箱。
均益二期管委會秘書高先生同八方講，其實劉天正從來未向管委會申請派口罩，話劉天正屈得就屈。高先生又話，民建聯財政資源咁豐富，可以改用郵寄方式直接送口罩畀居民。雖然佢覺得劉天正抹黑法團做法可恥，但佢都選擇「與其噴口水，不如噴消毒藥水」，噚晚凌晨已經喺該大廈一名熱心住戶免費借出器材下，漏夜喺大廈公眾地方消毒，嚟緊仲諗住同區議員合作，幫埋附近有確診個案嘅大廈免費消毒。
當區區議員黃永志就同八方講，過去一直都有關心均益二期嘅疫情問題，除咗有派口罩同潔手液畀街坊，亦有叫食環署加強清洗附近街道，並開街站呼籲街坊呢期要減少雀局同飯局。黃永志又話，均益二期周五再出現確診個案後，佢已經要求衞生署派專家檢視大廈喉管及通風結構有冇存在風險。
李八方