倒數11日，大家的2020年是如何走過來？梁祖堯說，「我接受咗今年所有嘢會突然出現同埋突然消失囉！」消失的舞台，他整整一年未踏台板，終於踏了，卻被宣佈不可演出，封場前的一場特別場，反應超乎意料，令團隊非常感動。「超窩心，嗰日下晝我哋成個團隊喊！」
一方有難，八方支援。梁祖堯說，香港人就是那麼可愛。縱使這個2020非常不可愛，都不可以被打沉，「我幾慣呢種徬徨同無助，我哋呢個業界係苟延殘喘同埋苟且偷生緊，但係我哋士氣冇話打沉到！」
沒有舞台的日子，梁祖堯一樣有他的舞台，耕田去也。最近身邊朋友越走越多，梁祖堯反而堅定要留下，「每一個人都要保住條命，保住自己，保住自己嘅權利，我覺得問心無愧好緊要囉！」留田又留人。
梁祖堯就是這麼熱心腸無畏無懼的人。「繼續要守住我哋嘅自由！」字字皆人話，他說的。
撰文：文嘉龍
《新聞小花的告白2白屋之夏》名副其實一波三折，3月、8月、12月的演出都因疫情而取消，這次損失更慘烈，上兩次未開騷已封盤，這一波，公演了才煞停，佈景服裝台燈聲，錢已燒。梁祖堯說：「好老實講，我哋都延遲咗第三次，最壞打算其實做都做唔成！」
演藝圈寒冬，尤其劇場界比起歌影視打擊更為沉重，梁祖堯說：「我成世人，入咗行之後未試過整整一年未上過台！」早前民政事務局局長徐英偉話，表演團體應該善用科技直播或錄播表演；梁祖堯就話，「首先呢件事係低能㗎！局長佢知唔知道，劇場裏面其實係冇WiFi呢？連手機訊號都收唔到，斷吓斷吓點做online呀？」
講就天下無敵，「如果你唔即場online streaming就剪接啦，起碼三四部機，拍嘢真係唔平，搭人哋膊頭，你搭得一次，你都唔好意思搭第二次啦，大家喺呢個寒冬時期，所以件事根本唔make sense！你唔可能要求人哋，買咗張400蚊飛睇你現場，𠵱家返屋企轉睇YouTube！唔通我寫封血書求吓你幫吓手，你唔幫，我哋就仆街㗎喇！我作為業界一個人，我自己都未試過完整地睇完一個online演出啦，喺屋企你總會走去屙吓尿，總會走去開罐啤酒……」
現場演出與網上錄播，梁祖堯說，「如果劇場可以拍低播，仲使乜要劇場？如果呢樣嘢可以拍低播，我哋去做電視去做電影啦！其實呢單嘢係搵一幅油畫，同一個雕塑去比較喎！」身為香港舞台藝術從業員工會副主席的梁祖堯，既是副主席也是苦主，今年劇場界的確好苦，「因為舞台業界徹底地係一個手停口停嘅職業，大把同業走咗去轉行，做凍肉啦、清潔啦、做物流貨車又有，幾個人夾份買咗一架貨Van。其實就算業界復蘇返，佢哋都要繼續養住呢架貨Van，冇咁容易返到嚟我哋個行頭。」
局長離地，搵馬逢國又幫到手？「最終我哋係換到佢嘅眼淚，佢喺某一個記招落淚，我哋都感動嘅，你要流嗰滴淚都唔易，尤其我哋做呢行啦，眼淚其實好值錢㗎嘛！我首先唔評論馬先生有幾幫我哋，或者做唔做到嘢，而係佢能力範圍，難道佢可以話，撥五億畀藝文界啦，佢都做唔到啦！」
梁祖堯2001年畢業於演藝學院，2003年與湯駿業和邵美君成立了「風車草劇團」，今年面對17年來的最大考驗。「捱唔捱得住？我唔知呀，今次我哋就蝕百幾萬，但係𠵱家好多觀眾都決定盲撐，決定唔退飛，我哋又可以唔使蝕咁多喎，可以過渡到呢一關！」
政府宣佈急停所有演出，梁祖堯當日就決定為《新聞之花2》封場前做特別場，星期二閒日下午的特別場，反應出乎意料，「我諗喺舞台劇界真係冇見過呢個現象，原來當香港人要幫香港人嘅時候係會咁樣，香港人有難嘅時候，大家係會走出嚟，呢個我哋都見證過好多次，但係直接受呢個恩惠，我哋係第一次，所以真係好衷心多謝觀眾。」
「失業」一年沒有舞台工作的梁祖堯，雖然一樣在Viu有節目如《晚吹》、《調教你男友》或在《造星III》做評判，錢賺得不多，起碼叫做保持曝光率。沒有正職的2020年，梁祖堯去了做農夫，「其實我嘅志願係做一個農夫，香港夏天種唔到菜要休耕，我休耕嘅時候就去做舞台，冇啦啦竟然喺呢個2020年，疫情開始之後，我真係做咗呢件事。」
今年農曆年前，梁祖堯難得與全家人遊韓國，梁媽媽是追星韓迷超愛BTS，反而梁祖堯卻是第一次到韓國，回來後武肺全球爆發，機緣巧合令他踏上農夫之旅。「我返到嚟有個做農夫嘅朋友，facebook friend從來冇見過面，喺反高鐵同埋守護菜園村時候識，平時like吓大家啲post，鬧吓政府呀，突然見到佢有個post話種咗好多蕎麥，唔捨得攪爛佢做肥料，問有冇人可以入嚟收割！我啲騷又停咗，我話我得閒可以去收割，之後佢問我耕唔耕田反正唔夠人，我話好呀，失業冇嘢做，耕呀！諗住耕個零兩個月，點知一耕就耕咗十個月。學到好多嘢好開心，開心到唔記得咗自己係一個舞台劇演員，甚至嗰段時間我覺得，如果我唔使養家，我真係可以咁樣過我嘅下半生！諗吓啦，因為始終都要交租，我都係買唔起樓嘅人。」
耕田的快樂，令梁祖堯領悟到不同感受，「一場黑雨可以一鑊蹺起晒所有努力，我學識咗一分耕耘，真係唔乸係等如一分收穫，唔好呃啲細路啦，一分耕耘一分收穫，食屎啦！一場黑雨乜都冇呀，但我學到嘅係，你唔耕耘，連嗰一分收穫都一定唔會有囉，基本上係一個只求付出，不問收穫嘅一個過程。如果用呢個心態諗，你個人自然會謙卑好多，呢個謙卑救咗我㗎呢一年，我以前都唔係一個咁謙卑嘅人，鏡頭前面做訪問，『我真係好虛心咁學習，我真係一個好努力嘅人』梗係會咁講啦，唔通話畀人聽，我好多嘢都不勞而獲，小聰明㗎咋，係都唔會認啦！耕咗田之後知道乜嘢叫做謙卑，自己一個嘅力量，太渺小。」
這一年，因為耕田，更提醒了梁祖堯甚麼是愛，「社會運動到疫情，大家好容易畀好多憤怒揞住咗自己對眼，呢啲情緒好搶眼，好容易有共鳴，但係唔好唔記得，佢哋都係源於對於一啲嘢嘅愛，如果你唔記得咗呢啲愛，淨係去憤怒，你個人就會歪。今年呢一個咁奇特嘅生活，提醒返我，對劇場嘅愛係乜嘢，劇場其實就係一個關於愛嘅地方，對種植嘅愛係乜嘢，對呢笪地方嘅愛係乜嘢，講出嚟好骨痹好肉麻好老土，但切切實實地，因為有愛，我哋先至行得到落去。」
去年的社會運動，今年的疫情，都為梁祖堯帶來很多創作靈感，「舊年寫咗個戲叫《米線女戰士》就係2019年『遺作』，講香港經歷咗一個毀滅世界嘅颱風，總言之連自由神像個頭都吹咗嚟香港，講香港人要保護嗰一兜湯底，最尾畫面係我哋六個人揸住嗰煲湯，巨型風扇吊落嚟大風到可以吹郁啲觀眾㗎，我哋揸住嗰個煲，六個人衝向個風眼，個戲就完，同呢個風眼硬拼！原本嚟緊3月（2021年）一早plan咗要寫貓奴，頂你個肺，呢啲閒情逸致嘅生活都市輕喜劇，一粒字都寫唔到，跟住放棄！」
貓奴寫不出，變成喪屍橫行病毒城市的《通菜街喪屍戰》。問梁祖堯怕不怕劇場創作有天都會受到打壓，他說：「言論自由係人天生出嚟，個天賦予畀佢嘅權利。我哋唔會想個世界衰，所以我哋講啲乜出嚟，寫啲乜嘢出嚟，我哋都問心無愧。我哋認為啱嘅嘢受到打壓，唔啱嗰個係打壓我哋嗰個人！用一個政治手段去打壓任何一個聲音，嗰啲聲音仍然會出現，你冚得呢一個蓋，另一個煲就會滾；你冚得呢個煲，嗰個鑊亦都會出煙。我覺得真實善良，係唔會被打壓到！」2018年已經講「攬炒」的《攬炒愛情狂》，如果要重演可能都受打壓？「我哋都預咗有呢一日，事實亦都話咗畀我哋聽，唔係個龍門闊窄嘅問題，而係個龍門可以搬去邊都得！」
今年「國安法」三隻大字，一定是2020的關鍵字，香港從此不一樣，「我諗同好多香港人一樣，保住自己𠵱家現有生活先啦，不過好sad係我識得太多朋友已經移民咗，同埋準備移民，同埋未準備移民都決定要移民。我想像唔到我呢一生會經歷兩次移民潮，97年係我中七畢業，移民潮喺我小學六年級8964之後，嗰時我全部最好嘅朋友一次過走晒，一個都冇，所以我中學過得好孤獨。我想像唔到第二次移民潮，我身邊好多好好嘅朋友都決定走，走咗又或者正準備走，尤其我哋呢個行業，可以做嘅空間好似越來越細！我唔會走㗎，總要有人留返喺度！」
今年44歲的梁祖堯說：「未社會運動之前，未疫情之前，未國安法之前，我成日都同自己講，賺夠錢我就移民去高雄或者清邁，有錢我就去京都退休，我嘅志願係50歲退休！呢個諗法已經變咗，我唔會移民，退咗休我都唔會移民，我要喺呢度繼續話畀大家聽呢笪地方係值得愛，我係一個香港人，我要愛呢笪地方，愛呢笪地方都係一個行動，繼續留喺呢度保護佢，繼續守啦，守住我哋嘅大嶼山，守住我哋覺得繼續要守住我哋嘅自由，守住我哋嘅言論自由！」
問梁祖堯怎樣形容這個2020年，他想了想，「我會覺得係平行時空囉！我覺得香港跌入咗一個平行時空嘅結界！」
劇場演員的創作力量同幻想是這樣的，「可能我會突然之間有一日，入咗去另外一個緯度，突然間進入咗另一個空間都唔定，原來冇㗎呢個病毒？原來我哋之前一路好不安嘅嘢，突然間所有嘢完咗呀？原來我哋好期望嘅嘢，突然間嚟咗呀！」
諗吓都開心。