海歸派精英在美國拿到名校碩士、博士、法律學位後，不返回北京上海工作，加入華爾街大行做ibanker，例如李小加，由一個內地新聞系學生到美國搖身一變就攞到「通行證」、入美林、入摩通，後因時間潮流啱啱好，入港交所做CEO，果真搵到盆滿缽滿，名利雙收，就係海歸精英中之新香港人。新一輩中環精英，在現時IFC、長江中心、花園道及西九ICC，有大把小「李小加」等上位。當然更有一批李小加同輩搵夠籌之餘，就如程翔所言，願意冒出頭來，組黨參政。
香港回歸23年，北京對香港人還是真的以為有高度自治、港人治港這回事，爭取真普選、不知自動澳門化/芬蘭化，早已大為不悅，去年見到仲有二百萬人上街反送中條例，有大量年輕人上街反抗，更是勃然大怒，一怒香港人不識抬舉；二怒香港特區政府無能而治，掌權23年還是不能洗香港人的腦；三怒本地土共及工商建制派在選舉方面常處於下風，冇鬼用，於是索性露出真面目，祭出國安法，要以強硬手段全面奪回治港權。一啲建制派寫手如兩位肥佬黎昔年女將，就已經有專文批評林鄭軟弱，硬不起來，好似係已收風，要順應阿爺心意。
但在國際上，還要香港掛上一國兩制呢個標籤，維持國際城市形象，保持國際金融中心地位，總不能直接自北京派人來港接管特區政府。若果有一批可信、可靠、懂得國際金融，慣咗聽話聽黨委書記指示辦事嘅香港永久居民當權，控制立法會（DQ晒泛民之後，比較容易），再有另一批做特首、司局長，咁就掂晒。
程翔估計就是在如此背景下，突然間有一位李山走出嚟話要成立一個「紫荊黨」，李山係四川人，清華大學經濟管理學院畢業，係朱鎔基學生、全國政協委員，絲路金融公司首席執行官，以前做過高盛、中銀國際CEO、MIT經濟學博士。創立紫荊黨以「為全體香港人爭取下一個50年不變，追求百年『一國兩制』為創黨目標。」係啦，即係北京對「舊港人治港」不悅，要換過一批人，呢批人係講普通話，1997前後自內地來港嘅香港永久居民！香港現時之官商階層要諗清楚自己地位嘞，極其量以後只係馬雲一名，使乜畀面你？至於民建聯工聯會，將來咪等於係內地之全國總工會，做花瓶囉！