城中富豪劉鑾雄同呂麗君所生嘅女兒秀盈（Zoe），自細已學芭蕾舞，舞技當然有返咁上下，噚日佢貼出一張凌空跳起做一字馬嘅相，既難度高外亦不失美感，Zoe仲話着咗對聖誕襪嚟應吓節。
前港姐冠軍雷莊𠒇不時於社交網分享喺加拿大嘅生活照，但依然被唔少網民狙擊話佢係「賓妹港姐」，但佢一於少理，噚日仲貼出半裸浸浴相，自信滿滿。
台星劉畊宏（右）日前喺台灣參加三項鐵人賽，估唔到吸引到男神言承旭出現喎！皆因言承旭同劉畊宏係好朋友，所以佢專程到場為好友打氣，認真夠朋友。
蔡卓妍（阿Sa 右）同鍾欣潼（阿嬌）合組嘅Twins出年踏入20周年，近日佢哋以白色孖妹look合唱《下一站天后》預祝，但阿嬌依然肥嘟嘟，收身仍需努力。
李嘉欣（Michele）同許晉亨所生嘅獨子Jayden眨吓眼已經九歲，近日Michele喺社交網分享囝囝沖涼洗頭嘅情景，不過就有網友批評囝囝已大個，應有私人空間。
