一班中環老友最近因疫情嚴重，連二人一張枱吃飯，開四張枱嘅飯局都唔敢參加；鬼唔係，中環有銀行分行人員中招，中建大廈名醫中招，高級跳舞群組之中招名人與我地班老友互相認識，一同吃飯，那怕只是兩人，都可免則免，費事互相影響，一個唔覺意，唔知累親邊個要入竹篙灣。
唔見面，冇得就時事噴口水，只好在WhatsApp講吓時事，因最近有人話要組織「紫荊黨」，兩位發起人背景，係海歸派精英，哈佛MIT博士、高盛、摩根史丹利高層之類，此等quali，相等於拜登內閣之布林肯（國務卿）、蘇利文（國家安全顧問），來頭甚猛。於是董事H問大家：「紫荊黨係乜料？」董事H自然係中環精英，但今天來講，中大港大畢業嘅，快啲行埋一邊讓路，北大清華加哈佛史丹福先至係當紅炸子雞。董事H一問，群組有人回應，左丁山忍唔住亦寫一兩句，請大家細讀中國問題專家程翔在眾新聞網站發表之長文：「對紫荊黨的蠡測──背景及性質」，分上下兩篇，12月14日發表。我地對紫荊黨之性質及成員，知道甚少，只知佢地以中環精英背景為號召，但居然宣稱會吸收25萬名黨員，都幾大想頭。
如果係純粹傳統中環人，無論海外回來或是中大港大畢業，最是醉心於搵銀及送子女到英國讀中學，到美國讀著名大學，甚少關心及參與政治，頂多係梁錦松事業有成，拉埋馬時亨入董建華政府，一心為人民服務（阿松讀港大時已有此志向），點知踩到地雷下台，馬時亨之後亦以頭痛為理由，離開政府。可見中環精英入熱政治廚房，都幾似北半球長途馬來到香港成日輸咁款，因不適應氣候也。
咁樣內地海歸派，畢業後加入華爾街大行，來到香港搵到真銀，有乜把炮可以進入政壇成為揸弗人？左丁山好懷疑啫，呢班普通話人未知到過鴨寮街、大窩口未？相信一定係離地一派，點可以憑選舉進入立法會？細讀程翔篇長文分析判斷，就可略知一二，根據程翔研判，紫荊黨人可能係北京嫡系，在此時刻冒出頭來係要成為「新香港人」治港，取代民建聯工聯會呢班藍領分子及經民聯呢班資產階級代言人，與中共地下黨員聯成一氣，全面take over香港，指揮一班公務員，操控紀律部隊。有此關係，班傳統舊香港人中環精英，快啲退休讓路！