【名家足路】
【對決場次︰奧格斯堡vs法蘭克福】連贏2次11月盟主港生，好多名家都覺得驚訝，咁嘅水準點解會做燈神，實情連我自己都唔知，時也命也，大家又邊估到林則徐真係會顯靈。好嘢唔好畀佢停，今周揀場奧格斯堡迎戰法蘭克福，我就睇好主隊嘞。
德甲周中開快車，大部份球隊7至8日內踢3場，球員體能往往成為勝負分野；奧格斯堡3仗中有2次留守主場，相對法蘭克福北上完禾夫斯堡，今周又南下奧格斯堡，法蘭克福呢方面有啲輸蝕。
奧堡近期戰績一般，如果唔計周中作客絕殺比勒費爾德，對上贏波要追溯到10月尾，不過當中和波居多，包括上周打少個都逼和史浩克04。奧堡安達夏恩確診武肺，冇咗呢位今季入三球嘅進攻中場，攻力點都有影響，好在另一前鋒尼達列治拿刑滿，配合老將卡利古尼，主隊仲有數糊能力。
法蘭克福今季只係輸畀拜仁慕尼黑同禾夫斯堡，但積分榜仍然落後第九位嘅奧格斯堡，原因係佢哋成日和波，12場聯賽和咗8場，好似周中主場對慕遜加柏，明明半場已經領先3:1，但補時階段連失兩球又和波，連續九場聯賽冇贏過。
法蘭克福另一缺點係入球過於集中，由AC米蘭買斷嘅安達施華今季入咗九球，數字雖然僅次羅拔利雲度夫斯基同艾寧夏蘭特，但其餘隊友幫唔到手，最叻只有荷蘭長人巴斯杜斯，有四球進賬，其餘入多過一球得新晉日本國腳鎌田大地同艾文巴確克，至於少數有入球嘅後衞阿巴謙，今仗仲要坐波監，死得啦。
文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。