【名家足路】
【對決場次︰奧格斯堡vs法蘭克福】上期《一燈決》，諗住要主隊嘅狼隊實冇死，點知最後都俾阿士東維拉絕殺，輸足兩期，搞到我似燈神多過盟主，最諷刺係，周中狼隊即刻反勝前列嘅車路士。既然英超同法甲都鬥筋肉人唔過，今次就揀場德甲嘅奧格斯堡對法蘭克福，我就要法蘭克福，希望隊波可以同我一齊贏番次。
法蘭克福近況的確麻麻，已經九場聯賽冇贏過，不過9場裏面只係輸過2場，其中一場仲要係作客對班霸拜仁慕尼黑，而且球隊對住啲前列球隊好似RB萊比錫、多蒙特同慕遜加柏表現唔失禮，三場都搶到分同對手打和。其實球隊上場對慕遜加柏嘅表現已經有番啲起色，曾經反勝對手領先過3:1，可惜最終中堅阿巴謙2黃1紅被逐，打少個先俾對手追和，睇嚟今場都係時候贏番場。
上場領紅嘅阿巴謙，原來34歲嘅佢決定1月就會退役返阿根廷，原本今場係佢喺法蘭克福嘅最後一場，但都因為停賽冇份踢，相信成隊都希望用贏波送別呢位效力咗球隊五年嘅中堅。加上球隊攻力強勁，葡萄牙前鋒安達施華今季腳風幾順，上場三個入波都關佢事，今季上陣11場入9球同2次助攻，今場我同法蘭克福都靠晒佢。
至於奧格斯堡，喺上個周末對住今季踢咗12輪仍然未開齋嘅史浩克04都贏唔到，雖然佢哋周中1:0贏比勒費爾德，但大家千祈唔好俾呢個假象呃到，對手「升班馬」比勒費爾德近10場輸足9場，奧格斯堡贏根本係最低消費，今場對住實力差唔多嘅法蘭克福，隨時見底。
文：港生
《一燈決》係今季新欄目，由上月擂台盟主同上月燈神拗吓頸，睇吓讀者信邊個。