【爆相爆片】
前年港姐冠軍、現年25歲的陳曉華當年參選時，即被揭與狄以達拍拖，但她當時透露參選前已分手，不過去年8月陳曉華及狄以達被發現在九龍灣撐枱腳，事後兩人齊聲否認復合，而狄以達更聲言不敢再約會對方，怕再惹誤會。昨日陳曉華被爆出有新戀情，報道指她跟現年27歲、在ViuTV劇集《男排女將》中飾演「魚仔」的MIRROR成員陳卓賢（Ian）秘密撻着，甚至已在荃灣築愛巢。
報道中指目睹Ian駕車載陳曉華去深水埗買外賣，另外女方又駕Ian的私家車載愛犬去扮靚及掃貨，其中似為愛巢添置家具及電器。但戀情爆光後，Ian的粉絲明顯不能接受，紛紛在網上留言鬧爆陳曉華，更指她是「長頸鹿」，又稱懷疑無綫用「美人計」撬Ian過檔等。《蘋果》昨日向Ian的經理人「花姐」黃慧君求證，她斬釘截鐵說：「車裏面嗰個唔係Ian，其他不作回應，謝謝！」而陳曉華昨日亦回覆傳媒指報道中認錯人，強調自己仍然單身。
言猶在耳，《蘋果》就收到陳小姐「爆相爆片」分享，指日前見到陳曉華跟一位男性在九龍灣買家品，但身邊人不是Ian，而是舊愛狄以達。陳小姐稱日前晚上約9時許在Mega Box撞到兩人「拍拖」：「見到佢哋攞泊車飛，陳曉華身形咁高，冇戴帽好易認，男嘅雖然戴咗帽同口罩，但都認到係狄以達，因為佢哋企正我對面。佢哋攞完飛之後行去停車場，冇拖手冇親熱表現，但嚟得呢個商場，通常都係買家品，不過狄以達有啲避忌，似乎唔想俾人認到。」從讀者提供相片所見，當日陳曉華所着的衫褲和斜孭袋，以及狄以達當日所穿的螢光珠片閃爆背心，不約而同在兩人Ig相片內找到一樣的服飾，證明陳小姐並無認錯兩人。
陳曉華工作量不多，演技又被狠批，但緋聞卻一單接一單，之前跟何廣沛拍劇而被傳愛黐男方，明撬朱晨麗牆腳，但兩人又例牌否認。現在陳曉華明顯跟狄以達未斬纜，另方面又盛傳跟Ian撻着，未知是一腳踏兩船，抑或收了兩個兵。
