特首林鄭月娥被北京叫停北上述職，正如季陶之前所寫，盛傳抗疫不力是原因之一，更成了建制陣營與林鄭政府「大亂鬥」的議題。有政界中人指，整件事反映當民主派離開議會，林鄭、建制派不但無法如曾珏成所言，做場好戲爭取民心，反而令兩者長期存在矛盾暴露出來，而中聯辦不但未有叫停，反而任由左報加入批鬥，「結果畀建制睇到林鄭『死穴』，梗係發力狂插，點都要拉佢下馬」，甚至想拖北京落水整治林鄭，但如此一來，隨時引爆新一輪民怨。
該政界人士指，「林鄭向北京篤建制派、建制不滿林鄭當佢哋冇到，已是公開秘密」，之前因有反送中運動、議會內又有民主派，再加上北京下令要撐林鄭，「即使兩邊幾唔妥對方，都要焗住合作」，但自民主派退出議會，反送中運動又偃旗息鼓，「𠵱家冇咗民主派呢個反對派，政府壓力就細咗，建制派插林鄭唔怕畀人話幫民主派，梗係搵位入林鄭」。
他更笑言，有建制中人對他說，林鄭過去和建制派有太多「牙齒印」，「即使唔插埋一份，但都唔會出聲幫佢，反正建制入面有唔同陣營想插到佢冇得連任」，而更重要是今次事件令建制看到林鄭並非百毒不侵，該建制中人稱，「今次北京、西環冇叫停批評林鄭，任由左媒插埋一份，畀建制睇到林鄭有『死穴』，就係『抗疫不力』，仲唔借機出盡力打」，所以該政界人士相信，今次「大亂鬥」不會很快完結，「特別係建制想拖北京落水整治林鄭」，但他指若北京及左派真的逼到林鄭強推全民檢測，「呢個影響700萬港人，一個搞唔好，隨時引爆新一輪民怨，到時北京、林鄭、建制就會三輸」。
季陶
周一及周五刊出