生科股之前驚大陸藥品集採範圍擴大，於是12月之前出現明顯沽壓，但今個月已經全線反彈。關於第四批集採有375種藥品減價，大陸吹風講到減價似乎冇市場預期咁嚴重，尤其創新藥影響較細，結果會喺出年1月公佈，撞啱到時B仔股將納入港股通，呢個板塊將會充斥唔少消息。
除咗集採之外，另一個重點係醫保藥品目錄，抗癌藥備受關注，其中PD-1/PD-L1產品角逐相當激烈，相關股份包括信達（1801）、君實（1877）、康寧傑瑞（9966）、再鼎醫藥（9688）同康方生物（9926），其中再鼎已經破晒頂，信達貴為龍頭走勢唔差，而康方亦值得留意。
康方生物月初公佈研發嘅PD-1/CTLA-4進展，將同國家藥品監督管理局進行新藥上市申請前溝通，由於進展理想，嚟緊有可能成為全球首款同類產品獲批上市，有望會喺本來競爭劇烈嘅PD-1市場之中脫穎而出，順利嘅話，康方生物有權由落後變成領先腫瘤生科股，值得留意。目前康方股價已經拋離保歷加上軸同5天線，仲有機會等佢回吐吸納。至於另一之前提過嘅優質B仔股榮昌（9995）啱啱起動，半新股當炒，有權追落後。
晉佳