咦，俗語不是說一沉百踩嗎，林鄭仍然趾高氣揚坐在市長寶座，未有往下沉跡象啊，怎麼北上面聖佳期一拖延，飛腿就從四方八面兜口兜面兜心兜肺踢過去？冇陰功，話晒都係接近七張的阿婆，老公和她零交流（她自己講的），兩個乖仔又不在身邊（關心她的觀察家講的），如何受得起這種粗暴對待，何況腳踢來了，拳打還遠嗎，屆時顧得上顧不得下，你話幾牙煙，縱使她最信任的警隊不離不棄，三萬thx一個都不能少，有福同享有K一齊P，狀況也太令人擔憂。建制派一號二號文棍左右開弓，《蘋果》廣告統計員荒廢正職義務圍剿，仲可以賴唔抵得嗰件粉紅色外套靚得滯，妒火中燒無故尋釁滋事，連《大公報》社評也加入「污名化」，究竟算什麼意思？處理抗疫「打工心態要不得」的指摘，即係話佢每個月收幾十萬人工結果hea做，受人錢財冇盡責替人消災，其實是莫須有罪名，你又唔係唔知，公務員嘛，總之朝九晚五坐在辦公室應卯就算功德圓滿，唔通攞條命仔同你搏，不長驅直入怠工心態mode已經叫畀面了。
公務員法文是fonctionnaire，字源和「功能」息息相關，初出茅廬的蕭菲紀蓮在巴黎歌劇院芭蕾舞團做舞女，就看不過眼其他舞者帶住打工心態hea跳，說他們當正自己是機器零件，不是藝術家而是公務員，不識時務開口及着脷，難怪犯眾憎。唉，真係細路女唔識世界，佢估個個都好似佢咁天生麗質，一企上台就成為舞壇瑰寶咩，姿色中庸的絕大部份人，不過打份工搵兩餐，唔係嚟打仗噃。