近日突然有個紫荊黨浮面,聲稱要廣納25萬黨員,其意圖就是要取代本地的建制派,讓根正苗紅的親生仔進駐香港。留島不留人,香港人的陣地一個個倒下,法律、教育、醫護被取代。作為會計師,我不會天真到以為自己的專業可以倖免於此。我歸納了三條路線,可以整死會香港會計師。
第一條路線就是人海戰術。例如開放專業互認,大陸會計師可以直接來港執業,或者通過簡單考試就可以獲得資格,溝淡香港專業會計師,面對大陸龐大的供應,香港4萬個會計師只能自求多福。同時,近年亦越來越多大陸留學生入行,客觀效果就是霸佔了香港畢業生的機會。
第二條路線就是紅資企業。雖然現時Big 4係外資,但其實管理層面已經歸大陸管轄,那些大陸人或多或少都跟黨有些關係,你不知他們何時執行政治任務。我估計長遠目標係香港公司將會被降格為「香港分所」,大陸逆向派人落香港,大陸合夥人空降香港簽名,大部份工序北移,只剩餘低回報的項目給香港人。
最後一條路線就是愛國愛港。以愛國綁架專業,鼓勵會計師互相監察,甚至宣誓效忠國安法,講錯嘢就可能隨時被釘牌,所有非愛國人士就被取消資格。當然愛國不一定有前途,所以無論你立場如何,只要你是香港人,都可以話係前途似咁。
神仙丁
《審計搵丁》負責人