同英超一樣，西甲同意甲都喺周中開快車，其中巴塞隆拿同祖雲達斯兩支班霸，喺周三比賽都有世紀大失機，基沙文同艾華路莫拉達一齊做大嘥鬼。巴塞就好彩啲，基沙文冇累球隊失分，喺主場保住勝局2:1反勝皇家蘇斯達；祖記就只能1:1賽和阿特蘭大，失咗兩分。
主場出擊嘅巴塞係先落後嘅一隊，27分鐘畀皇蘇憑住樸圖傳中畀前鋒韋利安荷西撞射得手。好彩巴塞反應快，落後只係四分鐘，就由佐迪艾巴右腳射個死角波幫巴塞追成1:1；完半場前兩分鐘，艾巴左路傳中，法蘭基迪莊禁區內輕鬆撞射破網，巴塞半場就反超前2:1。
基沙文賽前已經相當搶眼，呢位法國前鋒個頭整咗兩條辮仔，睇背影仲以為係女仔。但佢嘅腳風就認真麻麻，上半場早段已經禁區內射唔中龍；26分鐘自己殺入禁區扭過埋龍門窄位起腳又射中楣。去到55分鐘，艾巴左路再次傳中畀基沙文，佢離門三碼空門狀態下，竟然將個波省咗落隔籬失晒位嘅門將，俾人接到實一實，事後自己都O晒嘴，美斯見佢咁都唔入都失望抱頭，好彩最終球隊贏2:1，基沙文叫做唔使孭鑊。
不過，祖雲達斯就冇巴塞咁好彩，今場喺主場迎戰阿特蘭大，教練派路收起上場有波入嘅保羅戴巴拿，改派愛將莫拉達同基斯坦奴朗拿度（C朗）攻堅。2位12分鐘就差啲幫祖記開紀錄，韋斯頓麥堅尼中場搶波後直線交畀莫拉達，後者都唔貪功單刀橫傳畀C朗，點知又傳得太細力俾對方回防球員截到。但係個波彈咗去莫拉達度，佢竟然「高章」懶型用後腳射，個波完全唔中目標底線出界，令祖記要去到26分鐘先由費達歷高基艾沙禁區外遠射得手，半場領先1:0。
57分鐘，阿特蘭大嘅中場費奧拿同樣用一記遠射回敬祖記追平，點知四分鐘後基艾沙左路壓入禁區俾夏迪保亞踢跌，球證經VAR協助後決定判12碼，但操刀嘅C朗俾門將高連尼完全捉晒路接實個波，祖記喺2位前鋒1人錯失1次機會下，同阿特蘭大打成1:1各得1分，排喺聯賽第三。
至於米蘭雙雄，AC米蘭今輪作客熱拿亞俾對手2:2逼和，連續2場和波後仍以28分排榜首；國際米蘭就靠盧卡古嘅12碼一箭定江山，1:0小勝拿玻里，全取3分後升上第2位，追到只係落後米蘭一分。