華裔律師戴琦被拜登提名出任美國貿易代表，內地五毛立即做嘢，傳播一篇短文，話戴琦係戰時蔣委員長重臣、軍事情報頭頭戴笠之曾孫女。此文一出，周圍都講，連七十歲嘅賓架K都轉發畀左丁山、藍絲友又傳過嚟。講到戴琦背景複雜，與中共有血海深仇，佢阿爺就係畀中共於1951年槍斃嘅。
左丁山見到係簡體字短訊，心有懷疑，因內地微信微博有太多假嘢混淆視聽，信唔過嘅，只係用嚟呃海外大陸人嘅啫。點知到了晚上，紐約校友都轉發嗰篇短訊過嚟，問真唔真？睇怕成個華埠都收到呢個假訊息：戴琦是戴笠之曾孫女，對中共懷有血海深仇，貿易談判一定更棘手。
做細路時就聽過先父講戴笠之特務故事，記住呢個名字，印象中佢係蔣介石倚賴極重之共諜殺手，如果戴琦真係佢嘅曾孫女，戴琦背景非比尋常，但以中共對敵人研究之深入、之長遠，戴琦於1996-1998年間在廣州中山大學內之「嶺南（大學）書院」教英文，中共一定老早知道佢係乜人啦！
將文字交畀肥仔K去查證，肥仔K唔知戴笠係邊個，問查嚟做乜？方才省起，今天啲80後對1949年以前嘅國共內戰，完全冇認識，畢竟係七十幾年前之事，試問我輩在1980年識得幾多1900-1910年嘅事情吖，當年知道有辛亥革命，全靠在中學讀中國歷史，但國共鬥爭史咯喎，中學一直不列入課程，香港絕大部份學生，識鬼咩；但如果要教，你話今日嘅教育局會點樣審批課程呢？老師又可以引用「甚麼」參考書才不會被監察，被DQ呢？
卒之肥仔K在網上搵到台灣fact check網站www.tfc-taiwan.org.tw（台灣事實查核中心），該中心查證嚴謹，多方面核實，結論係戴琦與戴笠家族全無關係。
內地網民五毛係亂咁噏，呃海外華人，為禍甚大。講到尾，新加坡華人永遠話自己係新加坡人，唔會用普通話講：「我是中國人」，戴琦在美國出世，受美國教育，雖然能講國語廣東話，一定已經係百分百美國人，如副總統候任人賀錦麗，效忠美國憲法。但佢又未必似余茂春（蓬佩奧之國務院中國顧問）咁討厭中共政權，雖然佢兩位都係讀歷史，余茂春在中國長大，讀南開大學，對中國嘅認識自然更真確更深入。