自從民主派喺立法會總辭後，香港種種問題冇得賴民主派，變成由特首林鄭月娥同建制食晒，點知佢哋變咗籠裏雞互鬥，777因為抗疫不力已俾建制插，但佢前日為副局政助監誓，竟然俾建制傳媒爆佢監誓「企錯位」，仲要連中央領導監誓都唔會學佢咁企，成單宣誓隨時由政治正確變政治不正確。
777前日為問責官員監誓嗰陣，企喺印有國旗區旗嘅背景板前正中間位置，面向成班問責官員，而班問責官個個都舉起右手面向林鄭宣誓，成個畫面同獨裁者檢閱有得揮。
《星島》專欄盧駿噚日引述熟悉內地官方儀式嘅人話，777監誓畫面，同總理李克強喺宣誓儀式為官員監誓畫面好唔同，因為李克強係企側面，宣誓嘅官員係面對國徽國旗宣誓，而唔係面對李克強，所以質疑777企錯位，導致「令人有官員向她宣誓效忠的錯覺」。
八方懷疑呢個唔係「錯覺」，內地官員宣誓係向國家宣誓，問責官員宣誓正正就係要向林鄭宣誓啦，林鄭唯我獨尊，問責官正面向林鄭宣誓，以佢諗法，又做錯甚麼？睇返法官向特首宣誓，都係置中面對面；特首向中國國家主席宣誓都一樣。不過有政界中人就講笑話，特首向習近平宣誓梗得喇，問題係你林鄭唔係習近平嘛！要成班官向住妳宣誓效忠，單睇個畫面都政治不正確喇！
李八方