禮拜二意甲快車焦點一戰，落喺賓尼雲圖主場迎戰拉素身上，事關兩隊波分別由大簡同期師兄弟、前意大利國腳級前鋒恩沙基兄弟做教練，結果呢場兄弟內訌未分高下，「細恩」施蒙尼恩沙基帶領嘅拉素，雖然靠射手恩莫比尼喺上半場25分鐘入波領先，不過由「大恩」恩沙基帶隊嘅「升班馬」賓尼雲圖，喺完半場前憑一次角球攻勢，由舒亞達利拿扳平比數，最終兩隊踢成1:1和氣收場。
賽後大佬恩沙基就話：「今日係一場好奇怪嘅比賽，我睇到球場上有我同細佬嘅合照，但我要盡量將感情放埋一邊，專注喺呢90分鐘嘅比賽。」大恩仲大爆兩兄弟其實每晚都會傾電話，真係兄弟情深：「噚晚真係好奇怪啊！我哋通常都會喺深夜傾電話，講吓球員嘅狀態、戰術部署咁，但明顯噚晚我哋就要避開呢啲內容，真係一次好棘手嘅對話。攻破細佬隊波嘅大門我真係好難去慶祝，佢都係一樣，我認為細恩喺拉素取得非凡嘅成就，佢值得更多榮譽呢！」