蔣麗芸不時語出驚人，連抗疫都不時爆令網民笑足幾日嘅金句，之前佢話口罩可以蒸熟重用已經夠爆，但原來低處未算低，元秋噚日又有新搞作，今次仲勁，化身武肺專家，話美國輝瑞嘅武肺疫苗只得增強免疫力功能，根本冇乜用，仲話「同我食連花清瘟丸有咩分別？」
噚日喺立法會衞生事務委員會上，蔣麗芸化身「忠誠反對派」，就疫苗問題多次質疑政府，講講吓矛頭仲指向美國輝瑞疫苗：「據我所知，佢（輝瑞）話自己係唔能夠防疫，只能以mRNA增強免疫力，即係照樣會感染，不過可能未必有明顯病徵，甚至可能抵抗病毒會強啲，係咪咁？假如係，同我食連花清瘟丸有咩分別？」按蔣議員咁講法，疫苗查實唔係疫苗，全世界都俾輝瑞呢間騙子公司呃咗咁話？
蔣議員講緊嘅其實係中國紅極一時嘅連花清瘟膠囊，由著名抗疫專家鍾南山拍心口話：「進行實驗後，我有底氣、有證據來說，連花清瘟真地（對武肺）有效。」可惜，瑞典驗咗連花清瘟膠囊發現成份只得薄荷醇，即係治療唔到武肺。估唔到蔣議員連萬人景仰嘅鍾南山院士都敢揶揄，不愧為「忠誠反對派」！政府專家顧問許樹昌就好有耐心解答：「輝瑞疫苗可減低95%感染風險，部份人仍會感染，不過病情會好輕微，同埋少啲機會有嚴重併發症。」
李八方