受到武漢肺炎疫情影響，月初喺亞冠盃出局後滯留咗喺卡塔爾嘅廣州恒大，早幾日終於坐包機返番中國，不過主帥簡拿華路就懶理會方嘅歸隊要求，自己返咗祖家意大利度假，睇嚟佢喺中超教波嘅日子，已經進入倒數階段。
恒大今個月四號喺亞冠盃小組出局之後，突然宣佈更改架構，由「董事長領導下的主教練負責制」改為「董事長領導下的總經理負責制」，仲以充滿中國特色嘅任命，將之前已入咗教練團嘅鄭智升做球會總經理，搖身一變做咗大簡阿頭，擺明車馬架空呢位意籍主帥。中國傳媒就話，恒大會方曾經要求簡拿華路跟大隊返番廣州，同佢傾吓前途問題，但大簡就一於少理，仲以太耐冇見過屋企人為由，喺禮拜一同班助手齊齊飛返意大利度假。
消息就話，其實恒大仲未諗定係咪炒簡拿華路魷魚，所以暫時會按兵不動，等佢放完假返中國先算。事實上，喺亞冠盃出局之後，恒大已注定10年嚟首次冇盃落袋，呢隻鑊本來點計都係要由簡拿華路嚟孭，但有大陸傳媒指出，如果就咁炒咗呢位意大利籍教頭，恒大除咗要畀足剩番嗰1,200萬歐元（約1.1億港元）人工，仲要賠多5,000萬歐元違約金畀佢，恒大就算再有錢都唔會咁嘥。
不過，其實大簡仲想唔想留喺恒大，亦係一大疑問，事關中國足協早兩日無啦啦又搞咗個「限薪令」出嚟，除咗規定未來三季內，每支中超球隊喺單季嘅總支出，唔可以多過六億元人民幣外，恒大有傳都可能因為咁縮減班費，大簡都分分鐘面臨減人工。另外，外援嘅稅前年薪更加唔可以高過300萬歐元，唔少球星隨時要減8、9成人工，好大機會觸發逃亡潮。中國足協仲規定，任何超出薪酬限制嘅球隊，會被扣減6至24分聯賽積分，超出薪酬上限嘅球員，亦唔可以參加中國足協搞嘅賽事。簡單嚟講，即係唔可以唔跟。
據外國傳媒估計，效力上海上港嘅巴西中場奧斯卡杜斯山度士，係𠵱家最高人工嘅中超球員，佢嘅周薪達到45萬歐元，即係有成2,340萬歐元年薪，就算畀佢喺新制下出足300萬歐元頂薪，都要減超過87%人工（見附表）。雖然亦有報道話就住奧斯卡呢種世界級球星，中國足協唔會一刀切，會分三年逐啲減，但人哋當初肯嚟中超踢低水平聯賽，十居其九都係貪佢人工高，如果連呢個好處都冇埋，到時真係唔知可以搵邊個嚟踢。