一方有難，八方支援。因去年7.1闖立會案，被控暴動及進入或逗留在立法會會議廳範圍兩罪嘅藝人王宗堯（Greg），噚日喺網上公開請求大家「懲罰」，以應付可能達七位數嘅律師費後，唔少黃店即時大力「懲罰」。過去多次為黃店做一日店長、近日成為茶記「一日三餐」老闆嘅公民黨副主席譚文豪，宣佈「高薪挖角」王宗堯噚日去佢間舖做一日店長，呼籲黃色經濟圈嘅同路人，有咩商業合作機會都可以支持下Greg。
Greg噚日中午現身茶餐廳，即時換上圍裙開工，喺舖內招待客人、清潔、包外賣乜都做，佢又同譚文豪到店外同客人講多謝同影相，客人一句句嘅「加油」、「頂住呀」，令Greg好感動，仲有一名女士塞錢畀譚文豪，叫佢轉交Greg，但俾佢哋婉拒。
Greg提到有市民希望捐錢幫佢，佢話𠵱家搞眾籌有一定危險，所以佢情願用有尊嚴方式賺錢，再用啲錢去做需要做嘅嘢，至於擔唔擔心有客戶受壓而唔敢搵佢？Greg話搵得佢嘅客戶理念都好堅定，又話已知律師費條數大概幾多，所以想盡做唔靠人。
李八方