有線大地震那朝，有攝影師於立法會工作期間被解僱，他臨行仍按下攝影機直播按鈕，有記者形容他是「鐵達尼號上的樂手」；這邊廂在海盛路辦公室的林普斯被炒後，同樣執着於早上已動筆的意甲新聞，接過大信封又埋頭繼續：「似唔似鐵達尼樂手？應該係已經沉埋船，喺水底度寫埋份稿。」聽林普斯分享我越聽越入神，明明認真訴說悲劇主角命途顛沛流離，但一陣曲折離奇的喜感始終在深處隱隱躍動，彷彿他從未離開那既熟悉又陌生的錄影廠。
記者：洪量丰
攝影：翁志偉
鮮有網民於連登發帖討論男記者，但林普斯被炒消息傳開，連登一則關於他的帖文卻登上熱門，網民紛紛於網上重溫其精華報道，替他大感不值，林普斯直言受寵若驚，「有人可能會戥你唔抵覺得可惜，以後可能再冇得聽呢條友講波，調番轉嚟睇係一種肯定，做記者有個心態，寫嘅嘢係直接面向觀眾，唔係為上司、唔係為老細、為公司，當觀眾有迴響，覺得你寫嘅嘢都令我留到印象，都係一種安慰。」
其抵死啜核講波方式別樹一格，儘管他強調「我從來都係講緊場波」，但有人思疑他諷刺時弊抽水踩界招禍，他澄清從未被新任高層審查稿件，「呢四位高層係冇嘅，但係好坦白講，我同呢四位高層嘅交流亦都係冇乜，唔單止係稿件上冇畀意見，平時最多都只係點頭微笑，問多句食飯未呀咁，都已經係好多。」
偏偏在講求合作領導的新聞部，發生大事下屬徬徨，高層卻獨坐一角像是沒協助，林普斯清楚記得裁員消息一傳開，新聞部上下一頭霧水，未幾奪命電話此起彼落不斷響起，同事群情洶湧，出現電視畫面上追問高層一幕，「突然有個人事部負責人叫大家『返埋位做嘢先啦』，我會形容係有啲喜感㗎，好似睇緊周星馳嘅《國產凌凌漆》，阿漆無啦啦俾人拉咗去刑場，行刑嗰個仲同佢講冇事嘅冇事嘅，阿漆就話『冇事你都講得出？家陣我有事喎。』感覺就似返埋位做嘢你都講得出？家陣大家都有事喎。」林普斯在公司坐立不安，冷氣刺骨，他不敵寒意外出買飯，風蕭蕭兮易水寒，壯士一去便收到人事部呼他復還的消息，「我攞住個飯盒就收到電話喇，問我可唔可以入嚟會議室。」電影主角尚能靠幾根香煙和人民幣死裏逃生，林普斯逃不過被炒的驟變，他在茫茫人海中黯然度過最冷一天，「呢間公司又話架構重組又話資源問題，我都唔知點解冷氣可以凍成咁。」
阿漆一心盡忠報國，豈會想到到頭來國家只視他為一張廁紙、一條內褲。林普斯早於大學時期已在有線實習，2008年畢業即入職體育記者，先後採訪亞運奧運，2014年他再轉到港台當編導，「好坦白講人工同待遇係出面比較好，老老實實有線一路都唔係好大提升，另一方面係好好彩，頭幾年好多體育嘢都試過，感覺都好完整好圓滿，屋企人又會問有冇諗過搵份人工好啲嘅？所以我又出去試吓。」公務員一字記之穩，但林普斯習慣於人人「獨當一面，家吓集合埋一齊」的有線寫稿出鏡，到港台退到幕後要兼顧行政，他頓覺變成機械中一粒齒輪，心底掛念有線的人情味，「（港台）係劃得好清楚，呢樣會話『你負責番啦』，『唔好意思呀我夠鐘放工喇』，又例如會話『呢個都係你嘅工作範圍，你做番啦』，大家分得好清楚。喺有線就唔係，個交流同人情味都好濃厚。」
林普斯指朋友形容他「留住cable嘅血」，轉會他投依然心繫祖家，2018年國家有任務臨到，他思前想後，決定減薪「愛回家」。網上發現一份林普斯同屆中大新傳畢業生的就業概況，當時70人中尚有約30人投身傳媒，我八卦問他知否現時有多少人尚未轉行？他遲疑幾秒，直言除他以外，大概不出幾人。城裏的人說記者人工低工時長，紛紛想逃出圍城；他逃出去卻又衝回來，「我真係好鍾意做體育記者。」兩度加盟他道是緣分，說着往事忽然帶點教會傳道人的玄味，「我咁樣講有啲老套，哲學家話一個人冇可能踏入同一條河兩次，河水係咁流，時空係獨特嘅，你唔會再行一次你踏過嘅水，有時啲嘢都係咁啱嘅機遇。」萬物有其變，亦有其相對穩定，回巢時司令在，聞西在，迎賓的玫瑰卻變成杜鵑，麗晶酒店雖未淪為麗晶大賓館，但林普斯隱約意識到河水斷流，上游地帶漸現旱兆，「第一次離開前好似踢波咁，中前場又有，後防又有，感覺係全盛時期，後尾返嚟最大感受係，好明顯成個新聞部好似總係少咗人，有時入咗夜靜英英嘅，以前好似唔係咁㗎喎。」
再披有線戰衣，球隊雖然缺人，但為母會大家走多步，他自比美斯（林普斯：「咁我梗係冇咁好波啦」）墮後改踢中後場，他除了報新聞，又為手機應用程式另創節目，上載影片也是他一手包辦，「喺度做嘅人就係唔介意，如果真係能力範圍咪即管試吓囉。」網民戲謔藝人「搣唔甩亞視味」，他說有線出身的人也散發一種不能言喻的特質，「咁講唔係負面，呢個人儍儍地，做嘢癲癲地，點解會咁投入，有咁嘅激情嘅？ 哦原來係cable嘅。我有時返下晝更會唔捨得走，其實又唔係話有好多朋友傾偈，係件事我想做得好圓滿。」假如球隊需要，『美斯』不介意戴上手套把守最後一關，但正當全隊前仆後繼，「啪」一聲，球場陷入無盡的漆黑，「大家好畀心機踢好自己嘅位置，Sorry場波突然腰斬咗，球場直情熄晒燈㖭，家陣我好似一個球員企咗喺中圈，死啦！應該返更衣室換衫吖，定係同朋友傾多陣呢？」就算力戰而敗，記者起碼曾經付出，無憾而歸，現在一場地震大家卻死得不明不白，「我覺得好崩壞，係潰不成軍，都唔係講贏輸，都砌唔成一隊波。」
前輩伍晃榮說「波係圓嘅」，即使此刻林普斯代表有線踢的波已「完」，但他的報道風格早已深入民心，他笑說：「有人讚就好啦，但同時都有人鬧嘅，話我寫波咪寫波囉，鬼五馬六咁樣，場邊嗰個又講吓，呢個又講吓。」觀乎網民反應還是褒多貶少，甚至有人讚賞他有伍晃榮影子，他連稱不敢當，「有人咁樣比較係我嘅一個榮幸，但坦白講係爭好遠，冇一個人可以同佢比較，佢嘅程度係另一回事，又有佢嘅江湖地位。」林普斯指他時常回味伍的報道，其足球旁述固然吸引，連一些看似無關痛癢的比賽也報道得引人入勝，更顯高手，「例如一場跑綿羊大賽有咩好講呀？但你可以喺佢帶動之下睇晒，之後仲想再睇一次，跑完之後佢同隻綿羊講『飲番杯水先』，就係呢啲嘢都會影響到我，係喎！寫波唔一定係第三身好簡單咁樣寫戰果，可以試吓互動啲，點解唔得呢？」
無論以第一身或第三身報道，林普斯認為關鍵乃與觀眾互動，他不諱言體育新聞與港聞相比無疑被視為「次要」，但他期望每節新聞完結前，體育新聞至少能於刮骨取子彈時扮演「轉移視線分心大法」的角色，為被陰霾籠罩的觀眾注入些許能量，「新聞就係唔開心多於開心，尤其家陣疫情更加係，睇完一節新聞個人可能好灰，體育擺到最尾又有個好處嘅，唔知係咪叫阿Q精神啦，等到臨尾大家攞番少少嘢輕鬆吓，除咗球賽之外都可能有啲得意嘅故仔，例如話俄羅斯大力士拉架飛機，原來世界上有啲咁嘅嘢發生緊，某程度上都可以緩和少少，個人未至於咁灰。」
旁人或云體育新聞不外乎戰果和入球，上網隨手一掃即見，記者如何在千篇一律的「0:0、C朗先開紀錄、反敗為勝」中濃縮精華，挑起觀眾興趣，繼而引起共鳴？林普斯愛電影，他也以此作內功心法，「如果寫波影入球或者慶祝就永遠都係wide shot（遠景）再cut away（跳鏡），咁樣好似好死板好公式化，所以有時盡量諗畫面上可唔可以加多兩個鏡頭，場邊係咪有啲好特別嘅小朋友，球證會唔會有啲趣怪動作，教練發嬲嘅時候會唔會好搞笑。」在體育新聞的世界中，林普斯是掌控大勢的導演、觀察入微的編劇、準備充足的演員，他離職後，有主播形容與他同場報道會心跳加快，她寫道：「普斯總會靜靜對好位，入廠一個微笑，一開口，廠就成了他的主場，一控一射，一切都在他掌握之內。」林普斯的WhatsApp頭像定格於他在有線辦公室埋頭工作的相片，背後的牆掛上一幅相框，其上印有「It takes years to make an overnight success.」。台上一分鐘，台下十年功，他駕馭全局的氣場，絕非單靠一兩句抽水和歌詞能撐起。
相較荷李活大片，林普斯說最愛還是本地薑《國產凌凌漆》，周星馳的電影之所以為經典，皆因他深刻描繪出都市小人物的市井經驗，透過電影表達人在社會中善良與陰暗的張力、人情與利益的糾結。戲如人生，無奈人生亦似一場戲，阿漆唱畢《李香蘭》後子彈橫飛，他在槍林彈雨下慌忙逃生，大禍臨頭，他卻停步回頭摘下一朵白玫瑰，結果閃避不及身中多槍。
花為誰而摘？為他真誠相待，反於高處暗算他的李香琴而摘。
事後阿漆大難不死跑回車上，大腿雖血流如注，他未顧傷勢先兌現承諾，向她獻上血染的鮮花。
「呢啲唔係度度有，算你好彩呀真係。」
「你使唔使咁認真呀？黐線㗎。」
「咦你點知㗎，好多人都咁講我。」
這是凌凌漆的劇情，也是林普斯有血有肉、有淚有汗的故事。
