由特首林鄭月娥開始，到佢領導嘅高官班子，抗疫有幾唔掂、抗疫政策有幾離地，唔使八方講，市民自己有眼睇，但似乎林鄭自己唔多覺，好似噚日佢行會前講抗疫，又有句嘢超級離地，佢話雖然冬至同聖誕將臨，市民都對抗疫唔好掉以輕心，呼籲除非有必要事，否則要留喺家中，就算留喺屋企都要減少聚集。
嘩...好一句「留喺屋企都要減少聚集」，即時令到唔少網民着晒火，紛紛質疑到底林鄭知唔知香港嘅居住空間有幾咁不足？一家幾口住喺三百零呎小單位甚至劏房已經好普遍，當街又唔出得，屋企又唔聚集得，佢哋仲有邊度好去？有網民怒轟777，不如599G（即係《預防及控制疾病（禁止群組聚集）規例》）限埋屋企有幾多人好唔好？
連登都一片怒火，有人大鬧「真係離地到X街，你住皇宮咪可以唔使家中聚集囉」，有網民寸777唔通個個都好似佢咁住喺禮賓府、個個有幾千呎大屋，大到唔需要同家人聚集？有人諷刺一家四口如果在家做冬唔聚集，係咪要「1個喺房、1個喺廳、1個喺廁所、1個喺廚房，跟住開個MEET一齊食飯？」當然更多人諗到嘅係，林鄭同老公偈都唔傾，相信佢都冇乜親朋戚友，難怪可以做到唔喺屋企聚集。可能禮賓府內，只有現金可以「聚集」，但其實銀紙都好多菌囉.....唔知違反咗林鄭呢個口頭在家「聚集令」，有冇人上門控告喺屋企「非法集結」？有網民仲揶揄，777覺得返工幾百人逼車冇風險、差人畢業成百人步操又冇風險可以批；唯獨返屋企做冬食飯就好大風險，最好唔好，呢個係乜邏輯？
李八方