美國制裁中港個別官員、企業已成事實，銀行唔做佢哋生意可以點？林鄭咪收cash出糧日日數銀紙，有啲官咪直接出糧去老婆戶口。
一石激起N重浪，制裁引起嘅蝴蝶效應，可能比大家想像中更廣。法興上星期四公佈諗住發一隻新輪，本來冇咩大不了，但了不起嘅係，佢竟然想發中海油（883）嘅輪！
中海油喎，喺12月3日，美國公佈追加中海油母公司——中國海洋石油集團入制裁黑名單，所有美國公民自明年1月11日起，禁止進行黑名單上公司證券交易。法興呢個舉動，係令唔少人譁然：你唔係咁勇啩？果然，佢真係冇咁勇，佢喺入紙申請第二日就縮啦：「我們現決定認股權證，將不會如先前公佈所述被發行及在聯交所上市。」通告短到得一句，猶如同你講：你唔好問啦，你明啦。
美國制裁35間中資企業，涉30間港股，當中唔少都係大價股，好似中芯（981）、三大中資電訊股等。至今日止，涉及嘅輪證夾埋有569隻，有大量到期日都係明年1月11日之後。
你可以話美國人唔買就冇事，但發行人開得賭枱就要遵守遊戲規則，最基本係佢賣咗咁多輪證，就要喺市場上買返相應股份做對沖，咁111之後點算呢？呢啲嘢，一衰咗好大鑊嘅，就算係法興，之前都試過俾美國捉到同制裁國家進行非法交易，前年先交13億美元和解金去結束調查。
暫時來講，唔見有發行人有為呢單嘢表過態，亦未見港交所出聲；咁當然美國頒佈嘅行政命令資訊唔多，具體點做力度幾大都冇講。你話會唔會一夜之間全部輪證delisting？現階段應該未去到呢個討論階段，因為實在資料不足。就算數返香港輪證史上，亦只係試過一次有輪喺有街貨情況下退市，當時仲要搞到好大煲：2011年高盛發4隻日經窩輪，銷售文件方程式出錯，明明「除」數變「乘」數，掛牌後條街狂掃，最後高盛焗住溢價回購。不過世界變得太快，話唔定Biden一上場，就話「All sanctions are cancelled! I love China!」
千頌C