成日好高調咁用facebook專頁自我宣傳嘅香港PoPo，日前原來唔小心自爆咗其中一個管理員「真身」，叫「低調Joey」！話說呢期好多PoPo喺第四波疫情下中招，咁當然會令公眾極度不安啦，旅遊寫作人「薯伯伯」噚日喺fb發文，佢發現PoPo喺11號晚出咗一篇交代武肺警情況嘅帖文，離奇地多咗一句「Joey, 可否幫我低調地改？」喺最前，咁邊位係Joey先？八方睇過警察公共關係科（PPRB）社交媒體傳訊組人員電話簿，但冇人叫Joey。
有醒目網民當然好快諗到，Joey應該就係PoPo嘅fb專頁admin，既然Joey要接order做嘢，即係仲有個指令佢嘅人啦！咁要Joey低調地改乜嘢呢？原來係為原文加返英文繙譯版本，唔知Joey係有心定無意，將呢句嘢出埋街，令低調變成高調。
搞出個意外點收科呢？admin把心一橫索性唔改，實行直接刪文再重貼，令外界無法再追尋。咦，呢個手法，係咪好似PoPo一向嘅行事方式呢？其實八方都唔明，點解叫人幫手加英文繙譯係叫「改」，又點解要鬼鬼祟祟咁低調做，乜唔係話自己光明正大咩？
薯伯伯話帖文帶出唔少玄機，包括警方fb原帖作者嘅英文水平可能唔多掂，要由一名叫Joey嘅管理人員額外加上英文繙譯，更指原帖作者唔單止英文不濟，「還擁有肥大的手指」，將草稿文章直接發佈。薯伯伯仲話，用人民嘅血汗公帑請專業人員管理fb專頁，但就出現咁尷尬嘅「低調」留言，其實有冇好好運用資源先？甚至要再問，叫Joey低調繙譯嗰位係咩職級呀？竟然唔識英文？
李八方