【娛樂人物】御用師奶怕被自殺移民多倫多　黃鳳琼對港府失望　斥指鹿為馬冇咗公義

【娛樂人物】御用師奶怕被自殺移民多倫多　
黃鳳琼對港府失望　斥指鹿為馬冇咗公義

53歲的黃鳳琼昔日是無綫御用師奶，過去幾年在娛樂圈銷聲匿迹，原來她自2013年政府判港視死刑後，感到沒有公義，故決定移民多倫多。黃鳳琼日前接受《蘋果》電話專訪，慨嘆六年前政府已指鹿為馬，談到香港變天，她欷歔說：「好慶幸當年離開咗，如果唔係我可能已經『被自殺』，或唔知去咗邊。」

黃鳳琼在無綫20多年來拍過逾百部劇集，角色來來去去都是師奶、北姑、妓女等閒角，令她心灰意冷。工作20多年也未獲公司重用，黃鳳琼坦言氣餒：「放棄㗎啦，人哋專心拍嘢，我咪專心湊仔囉。當時只係當打一份工，因為朋友話做全職主婦會同社會脫節。」她說當年雖然主力湊仔，怛都會留意社會事件︰「真係開始參與遊行示威，係港視發唔到牌，比較深層啲認識到香港嗰啲政治人物啲態度。」

■黃鳳琼現於多倫多定居，越洋接受《蘋果》電話訪問，一頭短髮的她，精神不俗。

「港視嗰個衝擊好大」

2012年尾，王維基成立香港電視網絡（HKTV）準備進軍免費電視行業，招兵買馬力邀黃鳳琼加盟，令對演藝工作早已心死的她曙光再現，可惜2013年10月政府以「一籃子」因素拒絕港視發牌申請，黄鳳琼的演藝夢徹底粉碎，令她心死移民：「係㗎，覺得冇咗公義，不過𠵱家呢個世界冇㗎啦。」說罷她忍不住冷笑幾聲︰「我係對香港政府失望。」

黃鳳琼坦言移民另一個主要因素是為了三個子女︰「細路仔應該睇吓出邊個世界，所謂移民，你都可以讀完書返香港生活。但香港當時政府已經係咁樣，係咪更加應該出去睇吓呢？」黃鳳琼坦言，港視的出現曾帶給她希望和曙光：「當時我小朋友正正脫離照顧嗰段時間，我覺得港視幾有誠意，希望過港視後畀心機做嘢。」

2013年10月16日，政府判港視死刑後翌日，港視宣佈裁減320名員工，黃鳳琼憶述當日與同事相擁道別，仍歷歷在目：「你係未見過一間公司將啲員工炒魷魚，啲員工係會咁團結，咁開心去大家道別，所謂開心係嗰種難捨嘅精神，所以港視嗰個衝擊好大，我自己個人覺得，香港到咗一個指鹿為馬地步。」

「好慶幸當年離開咗」

移民加國後不久，黃鳳琼回復單身，現時全心全意照顧子女，偶爾會以玩票性質客串當地舞台劇演出。問可有興趣返港拍劇？她表示要視乎拍攝時間長短：「如果返香港住一、兩年，我唔會囉，幾個月嗰啲或者會考慮，但我真係太喜愛香港啦，我驚返嚟會死咗，香港而家咁開心......」問她是否講反話，她說︰「係呀！不過𠵱家好好彩，好多香港人都有一個機會可以離開，我好慶幸當年離開咗，如果唔係，我可能已經『被自殺』，或者已經唔知去咗邊。」

■2013年，港視不獲政府發牌，黃鳳琼激動落淚。

■黃鳳琼最記得在港視工作時，上下一心，一起抗議。直至港視被迫裁員，大家都互相安慰。

■加拿大生活簡單，黃鳳琼（左）閒時也會演出舞台劇。受訪者圖片提供

■在電視劇《點解阿Sir係阿Sir》，黃鳳琼和陳豪、楊怡合作，她演師奶角色，駕輕就熟。

■黃鳳琼在《九品芝麻官》中的表妹角色，觀眾一定有印象。

■黃鳳琼在1988年參加無綫《銀河接力大賽》入行，被編入奸角組，最終落敗，之後簽約無綫。