國產疫苗即將火速到埗，食衛局陳局長義不容辭充任推銷員，發言前似乎食咗誠實丸，大方承認新鮮出爐的武肺救星尚在臨床階段，「無論邊度嚟嘅都有機會出現問題」，真令人擔心粉紅色物體怒髮衝冠，立時三刻召她入禮賓府照肺，設計對白呼之欲出：「你個死妹釘吖，家陣叫你同阿爺散貨噃，你咁講究竟算點先，啲人聽到仲敢嚟做白老鼠嘅？」更弊的是，她竟然口沒遮攔慷他人之慨，大大聲話高官們不介意做先頭部隊獻身接種，「帶頭打如果畀到市民信心，我哋一定會咁做㗎」。嘩，呢次大鑊鳥，閣下自己中意捐軀咪捐飽佢囉，點解順手將滿朝文武拉埋落水，無差別把他們擺晒上枱，你教打針驚痛的甲乙丙丁情何以堪？第個都話可以側側膊詐聽唔到，PK繼續PK，十一哥繼續十一，肥婆繼續學跳舞，但年年考第一的黑面王騎虎難下，逼於無奈不能不表態，只好忍住道氣飾演應聲蟲，在面書宣佈任何一款疫苗獲准使用，都會第一時間去打。夾硬監佢打針之餘仲搶佢鋒頭，真係唔死都有排驚。
有鋪捉字蝨癮的我，斗膽建議陳局長最好修改「不介意」此三字，語氣太不懇切了，怎麼對得住中央的關愛，方丈小器你又唔係唔知，冇事嗰陣就話冇事啫，一有起事上嚟直頭會被檢控觸犯國安法㗎。呢嗱，用「樂意」先至啱，雖然有些少肉麻，但可保平安，何樂而不為？恕我冒險勾結外國勢力，鬼佬網民有云，「疫苗梗係高官先打，佢哋安全，即係話疫苗安全，萬一佢哋瓜咗老襯，咁我哋就安全」，確是至理名言，警隊也應該做市民的好榜樣，先打為敬呀。