空間中瀰漫着異味，滿身爛肉老鼠在頭頂渠道爬行，這是美孚北區議員李俊晞助理Eunis，對荔枝角收押所探訪者等候室的鮮明記憶。原本從事美容業，傘運期間受到政治啟蒙，直到去年抗爭突然間身邊眾多朋友被捕還柙，今年1月Eunis決定轉行，即使人工少一半亦要做議員助理，希望盡力支援、關懷獄中抗爭者。
議辦位置距荔枝角收押所只需十多分鐘路程，有借出地方予家屬領取探監物資袋，袋中有可交予還柙或在囚人士的零食、日用品，由零食網店早前以成本價眾籌後預備，有黃店一直免費幫忙運送到不同議辦，已送了40個星期。Eunis指議辦今年7月開始舉辦筆友計劃，「當手足家屬搵我攞物資，我就會跟進佢哋有冇其他準備，例如私飯、法律方面，要唔要筆友，或者有冇書想睇。」
計劃至今約配對了42對，她本身亦是「寫信師」，透過寫信、探訪，現有十多個獄中筆友，「佢哋有係咁同我講話想要筆友，啲信可以話係精神食糧。」
她指獄中朋友想收到描寫日常生活的來信，最理想是雙方均以朋友身份對等地表達心情，「平時有『解悶工廠』寄新聞、連登post入去，同埋佢哋有訂報紙，多數都係《蘋果》，都會知道好多時事，佢哋想要啲實質有內容互動嘅信。」
有時對方會請求「入書」，例如日本漫畫《進擊的巨人》，「呢個係入面比較多年輕人睇嘅，佢哋比喻係同香港𠵱家嘅狀況都幾似，我哋就係俾人屠宰緊嘅市民，嗰啲巨人就係政府高官。」但部份書籍難以「通關」，「例如《百年追求：臺灣民主運動的故事》，就未試過入到。」
這年來她觀察到，很多牆內抗爭者年紀較自己小，「有啲小朋友真係十零歲就入咗去，無可能唔心酸，我呢個歲數仲係睇緊卡通片，但佢哋就可能要面對牢獄。」她嘆一口氣，「好無力嘅地方係，望住刑期越判越過份，或者喺入邊受到不公平不人道對待，但人喺出面，隔住面牆，真係乜都冇得幫！」
與去年相比，今年探訪的輪候時間大增，意味還柙人數越來越多，「等候室環境已經好差，入面係更惡劣，佢哋有話一入去係要先住『豬肉房』一晚，真係2、30隻曱甴一齊瞓。」最心酸是，有人在獄中期間家人患重病，相親卻不能相見，「覺得個政權將佢哋推到去呢個地步，令佢哋失去咗中間應該要有嘅可能係學業、同身邊人嘅時間，真係見最後一面都冇辦法做到。」
書信和探訪，至少可令牢獄中多添一點希望，「希望大家唔好放棄佢哋，我可以做嘅就係呼籲香港人，唔好因為私事太繁忙而忘記仲喺入面嘅手足，佢哋好需要其他人支持鼓勵，佢哋係無罪，唔應該有咁嘅結果。」
正如她手上一封獄中來信節錄，「我們都渴求勝利，雖仍未看到任何曙光，如疾走在隧道中尋找那丁點兒的亮光，沒有勝利，沒有放棄。」